Seduccion
Halsa bo brasanan pa alaba den tempo
cu un corona ainda den un cashi den museo.

Den bo hadrei, m'a sint'i
loke nunca m'a sinti
pa 'n otro muhe.

rosea di chubato
inhala adolecencia
mientras drumiendo.

cubri e dolo di soledad
bisti cu capa di sufrimento
tapa e holor di ansha.

spierta den scuridad solitario
refleha arib'e claridad di e zonido
scucha e pasonan di mi edad.

cana den e sombra di alegria
seduci e scuma di imitacion
persigui e soño di Athenas.

aleha di e frontera di curpa
reposa e recuerdonan pabou
e trankera di sinceridad.

den bo hamaca, m'a sinti
e loke nunca m'a sinti
di sinti nunca antes
cerca un otro.

Teksto: © Quito Nicolaas
Derechonan reservá: Quito Nicolaas
Nada for di e texto aki por wordu copia di un manera ò otro sin autorisacion antemano di e autor.
For di Atardi di Antaño 2005 - ISBN 90805979-5-3 (Bron: De namiddagen van weleer, 2005)