Yiu sin Nomber
Storia di Pasco
Segundo parti

Cu poco palabra e tres grandinan a dirigi nan mes na Lisa:
"Nos a mira un lus riba cero y a puntra nos mes ta kende lo ta akiden?"
"B'a bin di leu pa yena nos curason cu alegria."
"Ta despues di hopi aña, e casita aki ta na lus atrobe!"

Lisa a halsa su bista wak e tres grandinan den nan cara y cu un pregunta den su wowo.
Esaki despues cu cada un di nan a entrege algo: un pida pan, un botter di lechi y un bela.
Lisa a brasa esakinan, mientras el a tira un mirada riba su yiu Ismaël, kende awor a kinipi un wowo cu e mama. Un señal inocente, despues di a ser rechasa den un comunidad chikito.
E mama cu n' por a soporta mas, mester a bandona e bario y busca refugio na Betlehem.
Einan si nan a acepte cu brasa habri, aunke cu un wowo skein. Mientras otronan ta murmura encuanto e tata ausente di un yiu cu asina un nomber significante, e mama tabata sintie cla pa responde delaster un pregunta.

Dispuesto pa defende su decision y e honor di un mama, kende a dicidi pa no

wak bek den pasado y conforma su mes cu un futuro den cual e mes ta tata y mama.

Cu e mesun shimis na curpa, el a cuminsa canta cu un bos di oro e canticanan di tempo cu e tabata mucha.
Mama 'nami cuminda, pa mi bai mi scol
Dia mi bira grandi ta bon pa mama mes
Mama con bai cu China, China ta poco bon
Ayera m'a mira China ta piki weso abou.

Asina'ki Lisa, bailando cu Ismaël den su brasanan, tabata yenando e soledad cu tabata rondon'e tur dia. E pahranan den cercania tur a cuinsa fluit, ora nan a scucha e melodia y e bos cu tabata compaña esaki. Ta mescos cu e colornan di e casnan, e naturalesa den vecindario y e shelo a cambia y claria e ambiente di Pasco. Ora Lisa a spierta e mainta ei, el a realisa cu e realidad ta otro. E unico cu tabata haci falta tabata un man pa yude cu tur e cosnan den cas. Pero el custuma di ta su so e ultimo lunanan y si Federico tabata tei of laga di tei, p'e tabata e mesun cos. E pasco aki a pase cu Ismaël ta habri regalo, faltando un di tres regalo. Su bida a cambia completamente y e no por a pidi mas cu loke tabata determina den bida p'e. Anochi Lisa a kita su renchi pone un banda p'e dera esaki su manece.

Teksto: © Quito Nicolaas
Derechonan reservá: QN/4-12-2006
Nada for di e texto aki por wordu copia di un manera ò otro sin autorisacion antemano di e autor.