Yiu sin Nomber
Storia di Pasco
(Promer parti

Manera semper e mester canta of neuri un cantica. Di alegria pa un dia nobo cu a nace un biaha mas. Lisa tabata sinti su mes diferente den un bario, unda un bida rutinario ta rondon'e. Hopi biaha el a acepta e horizonte cu un tempo a pinta pe. Pero e dianan aki tabata carga cu su wowonan cu algo cu nunca antes el a sinti. Un nostalgia, ora e wak e grandura di su barica, mescos cu tempo cu su mama tabata na estado di su ruman.
Cada biaha cu e pasa banda di e brug, e ta mira con e awa ta suta contra e murayanan. Mescos con den su barica e awa ta flotando den cual e criatura ta landando.Y e ta pasa su man suave asina riba e barica pa asina caricia e amor di un mama, cual nunca el a conoce.

E no tabata por a contenta su mes mas cu e idea cu nunca e lo no a bira un muhe cu a pari un yiu. Awor sikiera e por lanta un yiu, e por mir'e bai scol y crece bira un dama kende lo logra mas cu ne den bida. Tur anochi e ta drumi pensa riba futuro di su yiu, aunke e mes no tin mucho di ofrece. Pero e solo echo cu e tin un yiu a pone sinti fuerte, asta cu e ta tribi habri su boca bisa e loke e ta pensa. Algo cu antes nunca el a siña na scol of na cas di su mayornan.
Mientras e ta canando e ta sinti e yiu den su barica ta bira di tur banda. Un sensacion tabata cubri su curpa y dune un sort'i calafrieu. Un desconoci cu ta transforma su curpa den uno di un muhe, cla pa trece un yiu na mundo. Un fruta cu pa añas a drumi den su curpa y cu un dia lo spreit rama man'e un pal'i mata. Lisa tabata sinti su mes dushi, contento cu el a sali na estado. Un anhelo cu tabata yena su curason, awor cu ta temporada di pasco.

Den spiel e ta admira awor e grandura di su barica di casi nuebe luna. E tabata kier a stima un otro, pa na su turno por ser stima. Lisa tabata desea di splica cosnan, cu antes nunca pa motibo di su timides y angustia el a tribi di expresa nan. E temporada di pasco a toca un cuerde den dje, haciendo asina cu su bista a habri bira mas grandi. Na vispera di un bida nobo pa bira mama y riba un dia tambe pa bira wela. E radio den sala tabata pasa e propagandanan pa cumpra acesorionan y fiesta di Pasco. Su sinti tabata mas dirigi riba e dia cu e yiu mester a nace. No tabata interese si e bira un yiu muhe of homber, basta e nace rib'e e prome dia di Pasco. E tabata admira e otro mayornan kendenan tabata hiba nan yiu e scol di ballet. Cada biaha cu un pensamento similar brota bin ariba, e ta cue e cruz na su cadena tene y expresa su deseo. Pa maske un biaha den bida e por tin suerte na su banda, sin cu e tin mester di wak con pa lora un dia mas.

E madruga ei Federico a yega cas benta su curpa riba cama. Asina mes bisti cu su paña di trabou na curpa. E tabata hole stinki di bebida y un perfume cu no ta laga duda. E roncamento a stroba Lisa di por pega soño. Drumi di banda, e por a sinti e yiu sin nomber ta bira den su barica. Su heful a yena ora el a sinti su mes crucifica entre e yiu cu mester nace ainda y e tata. Un fulan cu un debilidad y cu n' tin compasion cu otro. Ki bal tin un tata asina, cu tei solamente pa pone bo curason remorde? Ora cu mester di dje, e ta hinca cu su amigonan ta calcula con pa saca su cuenta. Casi un aña e no a papia mas cu ne, kende ta mama di su yiu. Awor e kloknan di misa a cuinsa bati y Lisa por a imagina e hendenan ta cana drenta misa di e porta di patras.

Cu e cabuya den su man cu ta wanta e burico y riba su lomba un criatura, Lisa a cana den e cayanan di Betlehem. E mironesnan cu a agrupa a para un band'i caminda pa mira e mama aki cu su slof na pia, kende a bin di leu, ta busca un luga p'e sosega y kisas pasa anochi. E criatura riba su lomba tabata yora di flakesa, despues di tanto dia pasa cu el a bebe e ultimo botter di lechi. E yuchi su cara, tapa dor di un cuero di stof, tabata corra-corra. Lisa tabata realisa cu n' falta hopi mas cu e por yega un caminda sinta sosega y si tin hende di bon curazon, pa alimenta su yiu. Riba un cero den cercania el a mira un casita, unda e por a descansa un rato y pidi un poco awa. Su pianan casi no por a dal un stap mas, e peso riba su lomba tabata pisa awor mas cu nunca. Cu su garoti e tabata hala un pia pa otro, asina'ki forsando su mes pa bai dilanti y yega e casita prome cu nochi cera. Yegando cerca el a ripara cu e casita ta bandona y cu ta solamente carne tabata habita e casita aki.

No a tarda mucho cu el a sinti hende ta subi e cero bou di cantamento.
E tres grandinan a yega e casita, batiendo riba e porta prome cu nan a drenta. Un lanterno di kerosin tabata brinda un poco lus y tabata briya den cara di Lisa. E cas di torto su dak tabata casi pa cai aden y despues di tanto aña tabata tur seco y perfora. E bentananan a sali fo'i nan skarnier y un mesita di pal'i kwihi tabata brinda un luga pa sinta. Den un huki tabata tin un cama di hooi, ariba cual Lisa y su yiu tabata drumi pa recupera nan forsa. E holo penetrante di beskim cu tabata sali di e murayanan tabata causa di un tosamento sin fin.

Teksto: © Quito Nicolaas
Derechonan reservá: Quito Nicolaas
Nada for di e texto aki por wordu copia di un manera ò otro sin autorisacion antemano di e autor.