Dialogo den tempo

Dialogo den tempo (un fragmento) (Promer parti
Laman tabata bruto y e olanan cada rato tabata bira mas grandi.E anochi ei riba laman, nunca mas nan lo lubida Tabata den tempo di orcan, pero no por a haci otro. Ariba tera e biento fuerte cu tabata supla, a hisa e pertenencianan di un famia benta te na un crusada mas aleu. E dia anterior awacero a yobe henter marduga y strena cu lamper tatin tur hende spanta. Den un boto cual nomber e ta corda ainda: The Lord is my shepherd, nan a sali tempran ariba un diabierna anochi. Na pia nan mester a cana oras y oras largo pa yega te waf, pa e boto no sali anto laga nan atras. E cu su casa Wilfred apenas por a tuma despedida di e famianan cu a keda atras. Cu un curason kibra, nan tabata cana cu algun pertenencia na man y ariba nan lomba. Maske cuanto e lomba haci due y e pianan cansa, nan mester a sigui cana pa no perde e chens aki. "Unabes bo scohe y esei ta determina den bida, destino no por defrauda bo mas", Cande a pensa den su mes. For di tres luna pasa nan a cuminsa prepara pa e biaha aki. Mucho cos nan no tabata sa di e isla cu nan tabata biahando p'e. E unico cos cu nan tabata sa ta cu un compania petrolero lo cuminsa opera aya. Maske cuanto nan a puntra, niun hende por a conta nan algo. E famianan tabata preocupa, pasobra ni sa nan no tabata sa cu certitud unda e isla aki tabata keda. Tatin ta bisa cu e ta keda banda di Puerto Rico, otro ta bisa banda di St. Croix y hasta tatin cu a sugeri cu e ta keda ei banda mes: Virgin Islands, St. Kitts y Nevis. Cande a pensa cu e ta hiba tur cos cu e ta bai tin mester.	E no tabata concoce niun hende ariba e isla aki, cu e por a manda un carta pa sea un idea of pa bin topa cu nan. Ademas e carta lo a yega mucho laat, awor cu falta algun dia mas prome cu nan biaha. E unico cu e tatin bon warda den un pida papel tabata e anuncio cu a sali den corant, caminda nan ta busca hende pa bai traha. Hunto cu e anuncio e tatin un prenchi di Hesus y Mama Maria ta compaña esaki. Nan tur tabata hinca atrobe den un saco di plastic cu diferente yerba medicinal. E tabata corda esnan cu el a laga atras, y si cu tempo nan lo logra den bida. E mes no tabata sa kico ta sper'e n'e otro banda di Caribe. Unico cos cu tabata conta p'e tabata cu el a bandona su isla pa busca un miho bida y pa ora nochi cera e por drumi cu un sonrisa ariba su cara. Cande tabata na estado di Lenzy, su yiu muhe mayo. Porfin nan a yega e waf, unda un pa un mester a subi drenta sinta den e boto. E mamanan cu nan bulto den cada 'n man tabata busca manera pa balansea entre nan propio peso y esun den nan man. E tatanan cu nan sombre ingles y cu un duda den nan wowo, tabata trata na compronde e razon di nan decision. E capitan tabata duna esnan cu tabata menasa pa cai na awa un man. E boto a los anker y a cuminsa nabega den e scuridad di anochi, den direccion pa laman grandi. Despues di un mei ora cu e boto a sali di waf, Cande a hisa su cara wak na shelo y cu un alegria den su wowo el a contempla e scuridad cu un dia mester bira mainta ora e pisa pia ariba e suela di promesa.
Teksto: © Quito Nicolaas Derechonan reservá: Quito Nicolaas Nada for di e texto aki por wordu copia di un manera ò otro sin autorisacion antemano di e autor.		Sigui lesa ......