Dialogo den tempo
(un fragmento)
(Di dos parti

E boto cu nan dies abordo a sacudi henter caminda, mientras ta laman so bo ta wak. E oranan tabata parce dia awor, sin sa si nan tabata nabegando den e bon rumbo. E unico cos cu nan tatin na bista ta cu unabes nan yega tera, e portanan di shelo lo habri pa nan. A bira stofia un awacero, cu anteriormente Cande nunca a experencia di e forma aki. Cu e lenso mara na su cabes e tabata seca su cara mientras e paña na su curpa tabata papa papa muha, cu bo por a troce yena un hemchi cu awa. Den su barica e por a sinti con e yiu ta bira di tur banda, anunciando cu e kier ta liber. Cada pasa rato e tabata coi e pida papel cu e anuncio di corant den dje lora, y primie contra di su curason.

Tabata aña 1934, net e refineria a cuminsa opera na Aruba y nan tabata tin mester di hende pa traha. Di tur e islanan den Caribe, e mama cu e tatanan a emigra pa bai busca un miho futuro ariba e tera indjan aki. Den un corant e Caribensenan por a lesa cu Lago tabata tin mester di pipefitter, watchman, mesla, carpinte y sirvientenan. Ariba e otro islanan aki mes no tabata tin mucho coi haci; hopi tabata pasa den miseria. Y mane un custumber di antes tabata sali busca, hasta bandona nan famia pa algun tempo, pa yega na un trabou y entrada.
Mayoria di nan tabata manda cen cas pa mantene e famia. Esnan cu a biaha nan so, despues di tempo, tabata laga busca e yiunan pa asina e famia ta completo atrobe. Esnan cu tabata soltero no tabata tende di nan mas; ni un carta e mama a yega di ricibi. Nan a yega tera y mesora a integra den e sociedad nobo y casa cu un di e nativonan.
San Nicolas, unda cu e refineria tabata estableci y mayoria di e

Caribensenan a bai biba, tabata keto y casi no tatin bida. Anochi asina e caya ta keto, e tempo ei n' ta tin auto ta core, casi bo no tabata topa un hende ariba caminda. Ora bo pasa dilanti un cas, cual mayoria di nan tabata casnan di tabla, bo ta mira e lampi kerosin ta manda un rayo di lus. Solamente e bos di un machi bieu por a tende ta murmura algo. Mayoria di biaha e ta sinta conta storianan di spirito of di cosnan straño cu a yega di sosode pa cual no tin un splicacion. E muchanan chikito tabata sinta bon mucha asina rond di un mesa pa nan scucha parti di e historia cu nunca a yega di ser skirbi. Sa sosode cu e storia cu e wela ta conta cada biaha ta e mesun cos, solamente e nombernan ta cambia.

Nan tabata biba na bon cu otro manera un famia grandi. N' tatin mucho cos di haci y un tabata yuda otro ora tatin meste. Tatin di nan cu a ser contracta for di un cuminsamento y anan tabata bin cu avion. Nan por a cuminsa traha di biaha, mientras e otro-nan mester a solicita ainda pa un trabou. Ta masha hopi hende mes a bin pa trabou y casi tur tabata haya algo pa haci den e refineria. E mayoria di e mamanan tabata haya trabou como sirbiente pa yuda cu trabou di cas y otro a traha como nurse den hospital di Lago. Ora cu nan situacion tambe a drecha, nan tabata laga e wela, ruman, tio y hasta e bisiña a bin purba su suerte akinan. Tur hende tabata biba contento te ora cu den añanan cincuenta hopi hende a perde nan trabou na Lago. Hopi di nan a dicidi di regresa bek na nan isla y otronan a keda atras pa purba nan suerte un biaha mas.

Teksto: © Quito Nicolaas
Derechonan reservá: Quito Nicolaas
Nada for di e texto aki por wordu copia di un manera ò otro sin autorisacion antemano di e autor.