E
violin virgen
Promer parti
Ora mainta
habri su cortina e ta busca un luga pa drumi, despues cu henter marduga
el a cana rond riba caya y tosa sin piedad manera un hende cu tin pulmonia.
E friedad tabata seca su lipnan, su man-nan tabata bira stijf y converti
su cara manera di un spirito, mientras henter su curpa ta tembla. Diego
a custuma cu e frieu; añas atras el a nace ariba un dia cu e awa
a bira un clompi di ijs. Apenas un par di dia naci, e verplester a pone
ariba e balcon den tur e frieu pa asina por a haci su camber limpi.
Pero esaki awo si e no tabata por cu ne. Hasta su cabei den tur e biento
fuerte e anochi ei, no tabata wanta e frieu mane sa ta custumber. E frieu
tabata penetra tur parti di su curpa, apesar di tur e pañanan cu
e ta tin bisti un ariba otro. Ta parce cu nada no tabata yuda e biaha
aki. Asta su celebro a mane para un rato, mescos cu un oloshi cu falta
cuerde.
E marduga aki el a cana henter ora cu cara abou ta piki e cabitonan di
cigaria riba caya. Su lipnan paars tabata tur na blaar di e cabitonan
cu e ta huma.
El a drenta sali e cayanan unda esnan cu ta proteha tras di un heki di
hero ta biba, en busca di un moneda cu por yud'e pasa su dia. E lus di
caya ta manda asina un claridad, cu hasta un feneta bo por haya bek rib'e
caminda. Pero net un cen cu por a cai fo'i e saco di un carson, si no
ta blenk den su wowo ainda. Diego a dicidi di sinta un band'ei ariba un
pleinchi, pa e sosega un rato prome cu e sigui cana den direccion di un
otro bario. E dia aki cu ta transcuriendo si no a trece nada p'ele.
"Otro dianan mi sa haya algo di come di e bisiña cu a warda
e sobra di e dia anterior, paso e sa cu mi ta pasa ei banda.
Un pida carni cu casi nan a morde aden, su aros mejicano y un berdura cu ta desconoci pa mi. Otro biaha ta solamente un aros seco sin su saus, nan ta laga pa mi. Pero e Grandi ta cu mi. Sa tin dia cu ni come mi no ke come e resto cu nan ta laga atras pa mi. Mi stoma no ta duna e momentonan ei y ta boltia cada biaha cu mi habri e saco di papel den cual tin un of otro lora."
E merdia
ei e ta cana manera un persona sin compas, cu un sapato di cual e dede
grandi ta sali afo. Mescos cu pashent di un manicomio, e ta cana rond
ta wak abou so. E no ta maha cu niun hende y ningun di e pasantenan no
ta haci caso di dje.
Un ora un ora e ta hisa su plant'i man, como un indicacion pa nan por
dun'e un ki cu ta pa e por cumpra sea algo di come of di bebe. Su aparencia,
un paña tur ranfuña na su curpa cu ta hole stinki y cu un
cabei tur bruha, ta motibo pa spanta tur hende. Durante cu e ta cana,
e ta pensa con algun tempo pasa ainda e tabata biba den un cas y awor
ni esei e no tin mas.
"Mi no por culpa niun hende cu mi a para bira asina. Esaki ta debi
na mi mes; un falta di compromiso cu mi mes. Si mi no a habri mi boca,
mi lo no a perde mi trabou. Si mi no a neglisha mi casa cu mi yiunan,
awe mi por ta felis ainda cu nan. Si mi a regla mi asuntonan via un notario,
awe ainda mi lo ta tin algun di mi pertenencianan. Si mi no a bai tras
di mi amigonan, mi lo no a cai te na suela. Cada biaha e 'si mi a haci
esaki of haci esaya' , comosifuera bo por exclui tur riesgo den bida.
Matematicamente esaki no ta berdad, paso semper tin factornan cu por influencia
e resultado.
Teksto: © Quito Nicolaas
Derechonan reservá: Quito Nicolaas
Nada for di e texto aki por wordu copia di un manera ò otro sin
autorisacion antemano di e autor.
