E violin virgen
Di dos parti parti

Nan por ta un exponente tambe cu na su turno ta influencia e resultado final. Aha, asina mi gusta; mi por pensa ainda. Mi celebro ta funciona awe." Di biaha su mente a bai keiro. El a stet contra di e railing pa wak e hendenan cu ta para warda nan bus. Diego ta mira tur cu ta baha y subi e bus, cual ta yen yen caba. E ta corda con na Jamaica - ora anochi cera - tambe e busnan ta pasa cancan di hende, te hasta e portanan ta habri unda e pasahero ta wanta pa no cai afo. Cu un velocidad halto e bus ta sigui core, mientras apenas tur e pasaheronan ta sinta. Esta un barbaridad cu practicamente no ta existi un diferencia entre un pais grandi desaroya y un isla chikito den subdesaroyo. Edificionan halto cu nan arkitectura moderno y esnan chikito cu esun di nan tradicional, ta simplemente e cara di e sociedad cu ta transformando su mes. E caminda di asfalt den e mundo grandi y esnan di tera den e mundo chikito, ta marca e ancienidad di un pueblo, cu antes e hendenan a yega di biba manera tribo banda di otro.
E calor di e merdia ei a pone kinipi cu su wowonan y ora el a habri nan atrobe, el a mira un mucha muhe cu cabei largo su dilanti.

"Diego, ki mishi bo akinan?"
"Bo cara ta conoci, pero mi no ta corda bo mas."
"Un tempo mi a studia cu bo na e facultad di medici-nas na e universidad di Bologna."
Mientras cu e ta keda wak su dilanti, mescos ta den un camara e ta wak, el a contesta:
"Si, awor mi ta corda bo. Bo a cambia si!"
"Kisas debi cu mi a tiña mi cabei."
"No, pasobra bo ta bisti masha elegante."
"Unda bo mes ta bibando aworaki?"
"Niun caminda; anochi asina mi sa pasa unda un tempo mi tabata biba"
"Mi sa, e bario banda di Concertgebouw a cambia hopi."
"Apenas nan ta cuinda ora mi pasa ei banda."
"Kisas awor cu bo tin barba, nan no ta reconoce bo mas."
Diego ta cuminsa sagudi su cabes di robes pa drechi y no ta bisa nada.

E ta pasa su dos dedenan na su bigoti y ta keda wak na un manera masha pensativo. Den su mente cada fragmento di su bida ta pasa su dilanti y ta reproduci su mes. E ta cai sinta den un huki, pa e por concentra un tiki mas ariba e interogatorio di e hoben cu ta habita den su paden. E ta wak den laira pa despues e sak su cara. Ariba e letrero su dilanti e ta lesa loke tin skirbi: Cada ken tin su propio mascarada. Diripiente e ta cuminsa hari den su mes y por a nota e alegria ariba su cara. E ta rek bai atras pa len su lomba contra e muraya. Atrobe ta bira keto y e ta deliberando cu su mes keto bai. Despues di basta rato, e ta lanta su cabes y ta reacciona ariba e remarca:
"No ta paso mi a cambia, sino ta pasobra mi no ta posee nada mas."
"Apesar cu ainda bo tin tur bo placa un caminda bon warda?"
"Nan a kere cu nan por a laga mi sunu."
"Mi sa cu bo ta un hende bibo, mas cu nan ta kere."
"Nan a kere cu nan tin di haber cu un idiota," mientras cu el a dal un hari.

"Bo yiunan a bai studia na Harvard y MIT despues ainda? "
"Mi no sa kico a para di nan; nan no sa busca mi drechi."
"Abo mes n' sa puntra pa nan?"
"Cu ni mi casa n' kier wak mi mas!"
"E lo mester tin su motibo, bo n' ta kere?"
"Ami no sa; el a bisti mi pa despues kita mi benta un banda."
"Bo no ta kere cu esei ta loke nos ta yama despues di bida?"
"Por bien ta cu e contradiccionnan den bida no ta yega na un sintesis."
"Si nan no yega na un sintesis, con nan por ta un ponencia."
"Cada ponencia, segun e idioma y cultura den cual e ta ser pronuncia, tin su valides."
"Cu esei bo kier ilustra e caso di e Romano y Griegonan?"


Teksto: © Quito Nicolaas
Derechonan reservá: Quito Nicolaas
Nada for di e texto aki por wordu copia di un manera ò otro sin autorisacion antemano di e autor.
Sigui lesa ......