|
Pa
siglonan largo e tabata suspirá
Bao dje caricia suave di e lamar
na e momentonan cu e olanan tabata kibra
pa bañé cu miles di gotanan chikito
y cristalino, cualnan tabata briya
manera piedra di diamanta ora cu e solo tabata tira su prome rayonan.
E tabata ofrece e bista mas spectacular
dje beyeza di un structura asina singular
producto di e mannan di e Gran Escultor
den e paisahe unico sin su igual
cu a duna nos isla chikito fama mundial.
Ma ay.... e dia fatal a yega
den oranan scur di marduga
e olanan furioso tabata suta y skuma.
Un grito desgarador cu a sali
for dje entrañanan di nos Brug stimá
a rebotá den e barancanan kibrá.
Atras a keda solamente un ruina
di e Brug natural admirá y venerá
cuné e parti mas bunita di nos isla a bay.
Awor ta un recuerdo so e ta
conservá den curazon di cada Arubiano...!
|
