|
Igual
na un hoya den su estuche di felpa blau un klompi di oro incrustá
cu e piedranan almandin, esmeralda , topaz y garnafein: Ora Ubao pa
siglonan bañá cu un lamá color aquamarina, rondoná
pa playanan blanco briyante manera perla.
Ora Ubao, isla feliz, isla encantá, habitá un dia pa sernan
humano recio, beyo , agil y audaz den completo armoniá cu e naturaleza
bruto y primitivo dje baranca y cuebanan, refugio y santuario di indjannan
religioso, humilde y laborioso.
Ma ay... !
Un atardi na horizonte a aparecé e enemigo Alonso de Ojeda , un
Conquistador en busca di oro y di plata, e metalnan precioso y di mas
codiciá pa asina realizá y cumpli cu e nefasto proficiá
dje Gran Cacique, un sabio di gran prestigio.
For di nan escondite e indjannan yen asombro por a observá hombernan
buscunú, barbudo y mahos kendenan a plama riba e playanan bunita,
y e carabelanan hancrá.
For di un distancia tabata parce monstruonan feroz, cu a bini pa devorá
y destrozá e dushi y aparible bibá.
Den poco dia riba e Isla presencia di e invasornan a cubri cu un mantel
invisible di tristeza y dolor loke un dia tabata limpi di tur cudicia
y di malicia !
Historia a coge su rumbo, e donceya a perde su pureza e mancebonan a wordu
transportá pa tera straño.
For di e cuebanan di Guadirikiri, Fontein y Huliba bo por a scucha e lamento
y e canto di tristeza.
Biento a carga e eco dje kehidonan desgarador y yen piedad a conberti
nan den un suspiro di amor pa hibé p’esnan na tera leu cu
atras a laga esun di mas stimá.
|
