|
Mama Naturaleza, manera tur dia tabata pasando kanto di e lamar pa
controla e lamar blau y e santo blanco, pa asina weita pa tur cos tabata
den harmonia cu e solo briyante y e cielo cla, camnda e nubianan blanco,
manera un ehercito di peluche tabata core un tras di otro.
E dia tabata precioso y e brisa, den kompas cu e vaiven di e olanan, tabata
ofrece un melodia dushi y suave.
Ma diripiente un sonido melancólico y tristo a hala atencion di
Mamam Naturaleza y el a ripara cu e mata di fofoti kanto di lamar su blachinan
tabata cubrí cu lagrimanan, cu poco poco tabata cay y muha e pia
dje mata.
E fofoti tabata yora...!
Mama Naturaleza a puntré:"Pero mi yiu, ta pakoko bo ta yora,
kiko ta molestia bo curazon...?
Ay Mama..., mi ta sinti te den mi entrañanan un dolor profundo.
Mi ta víctima di un discriminacion cu no tin comparacion.
E ta un menosprecio cu hamas mi por a imaginá.
Semper mi a biba orguyoso di loke mi ta, di mi beyeza cu a inspirá
poëta y pintornan.
Yen di gratitud na mi Creador mi a ofrece felicidad na tur cu por a admirá
un obra mas di e Gran Escultor.
Miles y miles di fotografia di mi a circula riba e mundo aki y mi a sinti
mi feliz di por a haci tanto hende conteto di por a contempla mu silueta
na e momento cu e solo den tur su splendor ta yama e isla ayó...
"Ma mi yiu, te ainda mi no sa ta kiko ta e motibo cu bo ta sintí
bo descriminá, pasobra enberdad den e harmonia cu ta lo mas esencial
pa e conbibencia di tur criatura, no por tin descriminacion. Ta kiko a
pasa anto...?"
"Mama Naturaleza, awor mi ta haña tende cu mi ta un imitacion
di e mata di dividivi. Ke meen cu mi cu mi no ta autentico...?
Mama Naturaleza, ta kiko mi ta anto...?
Mi ta un divifoti, o mi ta un fofodivi...?
Mi no tin mi propio identidad mas...?
No ta descriminacion esaki ta...?
No ta husto, despues cu mi a haci mi isla asina famoso......"
Mama Naturaleza ta pasa su man yen di caricia riba e troncon corcobá
di e fofoti y ta consolé:
"Ay mi yiu, bo ta original y autentico, mescos cu e solo, e luna
y e streanan.
No ta di importancia kiko otro kier pensa di bo, contal cu abo sí
sa ta kiko ta bo balor.
No considerá bo mes víctima di discriminacion.
Aki ta trata di puro ignorancia.
Atraves di tur e siglonan hende a trata di analisá y coregí
obra di nos Creador, pero bo tin un poco razon di ta desilusioná
cu nan kier traha di bo un caricatura.
Esey no por...!
Esaki ta un motibo mas pa bo sigui luci bo beyeza como parti di e bista
mas precioso, den harmonia cu e solo y e lamar, caminda no tin lugar pa
tristeza, solamente pa admiracion, gratitud y alabanza.
Seca bo lagrimanan pa asina bo blachinan por lombra y reflehá bo
buniteza.
Bo ta único, nos fofoti bo ta...!''
|
