Proverbio cu letra: S

nr.	palabra	nificacion
426.	El a haña sarampi na biéheza:	Awor cu e ta bieu e ta haci cos di mucha.
427.	E ta sanca 'fo :	E ta bashí.
428.	Satanás sea surdo :	Mihor cos keda manera e ta ; ohalá no bin cambio .
429.	Bo ta un San Thomas :	Bo no ta kere si bo no mira .
430.	Manera sardinchi den bleki :	Yen yen ; gepak riba otro.
431.	Su fortuna a bay manera salo den awa :	Mashá lihé.
432.	Nos no ta ni awa ni salo di otro :	Nos no ta famiya ; nos no ta nada di otro.
433.	Soppi purá ta sali salo :	Cos hací den purá ta sali malo .
434.	E tin bon scol :	E ta bon siñá .
435.	Nan a traha un scol pé :	Nan a hinké den un trampa.
436.	Mi no a bay scol cu bo :	No tuma confianza ; mi no ta bo pareu.
437.	Mal nomber ta siboyo largo :	Duna un hende mal nomber ta dificil pa bo drecha.
438.	Ta rancamento di siboyo tin :	Ta bringamento pa puesto tin.
439.	Confianza a mata siguranza :	No confia di mas.
440.	Bo ta salá :	Bo tin mala suerte ;den lotería ; bo ta fuku.
441.	Mi a baha su scama :	Mi a poné na su lugar.
442.	Tur shimarucu ta hecho :	Tur cos ta reglá .
443.	Planta bon simiya pa bo spera un bon cosecha :	Duna bo yuinan un bon educacion ; pa bo por spera bon di nan.
444.	Nan ta un skér cortá :	Nan ta parce otro hopi ; nan ta idéntico.
445.	E falta un skruf :	Su cabez no ta traha bon.
446.	El a perde sintí :	El a bira loko di rabia.
447.	Solo ta sali pa nos tur :	Nos tur tin derecho di ta feliz ; nos tur tin derecho di haya un oportunidad .
448.	E ta manera un sheu :	E ta den mal condicion ( su aparencia ).
449.	El a keda sheu :	E no a logra ; el a keda cu gana.
450.	No tabata tin caminda di tira un sombré :	Tabata tin un multitut enorme.
451.	Mi no ta confia ni mi sombra :	Mi no ta confia ningun hende.
452.	E ta drumi soño di morto ::	E ta drumi soño masha duro.
453.	Sucu no ta caba su mes :	No gaba bo mes , laga otro haci esey.
454.	E parce skorpion dik :	Bo no por mishi cuné ; e ta rabia lihé .
455.	Strea cu sali tempran , tempran e ta drenta :	Si bo ta haci cos di hende grandi tempran bo ta caba ; bira bieu lihé .
456.	Su strea a drenta :	E ta cabá ; e no ta sirbi mas.
457.	Papiado di berdad no ta haya un stul pa e sinta :	No ta tur ora cu bo papia berdad nan ta tuma bo na bon.
458.	Hopi scuma poco chuculati :	Hopi buya pa algo sin importancia ; hopi boca, cabez mes ta bashí.
459.	Tanto bal Sana como Wana :	Tanto bal esun como e otro ; no ta haci diferencia.
460.	Suerte a pasa bunita :	Si bo tin suerte bo ta logra , maské cu bo tin poco chens ; bo no sa nunca , bo por tin suerte.
461.	Un fiésta di kita sombré :	Un fiésta masha grandi ; un fiésta cu hopi luho.
462.	Tin ora mala suerte ta drenta pa porta y pa bentana :	Tin ora un desgracia no ta bin su so.
463.	E tin suerte di pushi preto :	E tin hopi suerte.
464.	Ta mi sanger e ta :	Ta mi famiya e ta.
Texto: © Digna Laclé-Herrera Derechonan reservá: Digna Laclé-Herera Danki N.Hoevertsz cu a typ e texto			comienzo

comienzo