|
Cu su mannan chikito
Mayra tabata cariciá e Niño Hesus den e pesebre. E luznan
di tur color tabata reflehá den su wowonan grandi y bunita. Esta
netji Machidú su pesebre tabata!! Pa Mayra no tabatin ningun otro
pesebre bunita. Ni esun di den misa tabata asina netji manera esun di
Machidú. Pero un cos tabata intrigá MAyra. Den ningun pesebre
el a nota e imahen di e santo bistí na marón pará
tras di San Hose. Ni den e pesebre di scol. ni e di misa, ni e di cas
y ni den esun cu el a mira den un showcase na Playa. Mayra tabata conoce
tur e figuranan. E Niño, Mama Maria, SAn Hose, e wardadornan y
e Reynan tur e tabata reconocé. Na scol e mes a pinta un pesebre
mashá bon mes y juffrou a prik e riba bordji.
Dia
cu juffrou aconta e storia di Pascu di nacemento el a scucha masha bon
mes, ta pesey e por a pinta e pesebre asina bon. Machidú, e imahen
pará tras di San Hose, ta ken e ta? Den ningun pesebre mi a weité.
Joffrou tampoco a conta nos di dje.
Machidú a hari y a pasa man den Mayra su cabey. Cu un boz yen di
amor el a bisa: Mi yiu, esey ta un historia largo. Lo mi bay conta bo
ta di ki manera e imahen di San Antonio ta forma parti di mi pesebre.
Pero promé bo ta canta e cantica di Pascu cu bo a priminti mi.
Cu un stem fini Mayra a canta e precioso cantica di pascu Bonbiní
o Niño.
Machidú
ke tendé awor na Hulandes? Nu syt wellecome....
Claro mi amor, bo ta canta asina dushi, cu mi por sigui scuchá
bo hopi ora mas.
E boz infantil a completá e ambiente di Pascu cu tabata reina.
Machidú su cara tabata reflehá con feliz e tabata sintié
den compania di su bisanieta.
Danki Mayra. Mas 'oró bo ta canta pa Pachidú tambe scucha
con bunita bo ta canta, pasobra awor e ta drumi. Y awor e historia:
Sí, esey ta un imahen di San Antonio. Un dia lo mi contabo di e
Santo ey. Bo ta ripará cu e tin un niño cargá den
su braza? Esey ta Niño Hesus, kende ta un gran amigo si San Antonio.
E santo ey a yega di scucha masha hende nan oracion y ta pesey e tin hopi
amigo aki na mundo. Ami semper apidi su yudanza den oranan di necesidad.
E historia cu mi ta bay conta bo a sosode hopi aña pasá.
Tabata den e dianan di Pascu y mi tabata cerca di duna luz, esey ke meen
haya un baby....
Mescos cu Mama Maria, no Machidú?
Sí, mescos cu Mama Maria y tur otro mamanan Mayrita. Pachidú
no tabata na 'Ruba. E tempo ey hopi hende cu no tabatatin trabao tabata
bay Cuba pa corta caña. Aya nan tabata gana bon....
Pachidú tambe a bay langando mi atras cu bo madushi na barica y
mo Diek na edad di dos aña. Mi situacion tabata malo pasobra ya
a haci dos luna cu mi no a haya ningun noticia di Pachidú. Durante
e siete luna cu e tabata 'fo mi a haya dos carta di dje y binti dollar.
Cu e placa ey mi a laga drecha e dak di cas cu tabata lek y haci otor
gastunan di cas. Mascu cu binti dollar tabata basta cen e tempo aya, sinembargo
el a caba. PAscu tabata cercando y mi tabata boca'bao. Esey ke meen bashí.
Como cu mi curpa tabata birando pisá mi no
por a bay strika pa hende tampoco pa mi por a gana algo. Mientras cu tur
hende tabata haci preparacion pa Pascu, mi tabata bira dia pa dia mas
tristo. Mi mama tabata yudami cu algo, pero e pober mes no tabatin suficiente.
E nobena di Pascu a cuminzá. Esey ta nuebe dia di oracion y sacrificio
di misa, Mayrita. Un bunita custumber Cu nos a keda cuné. Marduga
mi tabata lanta pa mi bay e misa pa nobena di Pascu. Pa mi no tin Pascu
di nacimento sin su misanan di Aurora. TA pesey te awe mi no a falta ni
un.
Machidú, ami no a bai nunca...
Esey ta pasobra bo ta chikito ainda. Bo mester di
hopi soño, Mayrita. Pero laga mi sigui conta con San Antonio a
yuda mi. Mi a dicidi di pidi e santo, mi amigo, pa presentá mi
un noticia di Pachidú.
|
Ta
pesey cu despues di e misa di Aurora mi tabata keda pa e otro misa y asina
tene un nobena na San Antonio. Mayrita, baha e radio un poco mas, dushi,
e música di gaita ey tin mi cansa caba. Nan tin mes di cinco siman
caba ta toca gaita. Awe ta Pascu, awe ta cantica di Pascu nan mester toca
y no e sorto di música ey cu ta mas desordu cu nan ta cantica.........
Si, pero Machidú e gaitanan tambe ta di Pascu.
Ay Mayrita, esey ta bon pa hende hoben, pero Machidú ta bieu caba.
Ma laga mi sgui conta...... Bueno, di tres dia cu e nobena tabata andando
mi a tende cu nan tabata spera un barco di Cuba den e dianan ey. Mi curazon
a bira contento. Mi a cuminza drecha cas. Mi a saca e cortinanan di fiesta
fo'i den baul y mi a strikanan. Mi a bari e sabana rond di cas y mi a
kima tur sushi. Un legria cu mi no por a splica. Mi a laga busca Buchi
Goi pa bin tira den flur.......
Santo Blanco den flur Machidú..? Esy ta pa susha e flur....
No, Mayrita, e tempo ey tabata custumber di plama e santo blanco ey den
cas. TAbata un señal di limpieza. Ademas e flurnan no tabata di
mosaico ni tabatatin tapijt, eflurnan tabata di tera of cement. Enfin,
mi a laba glas, kelki, karafi, preparando asina pa Pascu. Tur mi tristeza
di úultimo dianan a disparce. Un shimis nobo mi no tabatatin, pero
pa Diek si mi a cose un bunita carzon cu gjel. El a paré masha
spierto. Tur dia e imahen di San Antonio tabatatin su luz y su flor. Tabata
parce mi cu e santo tabata weita mi cu amor. Esey tabata mi imahinasion
naturalmente. Den misa Pastor a cuminza drecha e pesebre caba. E temp
ey no tabatatin luz di color pasobra no tabatatin coriente, pero dia di
Pascu mes e pesebre tabata keda mashá bunita cu tur e belanan cendí.
Nos Pastor tabatatin smak pa dorna un pesebre.
Dos dia promé cu Pascu e barco adrenta. Asina cu mi a sali fo'i,
mi mama a bin contra mi pa conta mi cu e barco tabata drentando. Purá
mi a lanta Diek for di soño y nos a bay waf. Tabatatin manera semper
basta hende cu a bin busca noticia di cuba. Mi a yega ya ora cu e barco
tabata marando, pasobra mi curpa tabata asina pisá y Diek su pasonan
chikito. Riba dek mi por a mira algun hende conocí. Diripiente
mi a mira den nan un figura familiar. Mi curazon a cuminza bati purá-purá.
Mi no por a kere loke mi tabata mira. Sí, tabata Dichi. Dichi mes.....
Un poco flacu y kima di solo, pero cu un cara contento. Mi no por a muf
y mi a warda te ora cu Dichi a baha bin contra mi. Mi legria tabata grandi.
Ora cu el a cohe mi tene den su brazanan tur loke mi por a haci ta yora.....
E mesun anochi ey bo madushi a nace Mayrita. Nos ayamé Aurora Antonieta.
Nos promé yiu muher! Dichi a cumpra tur cos bon pa fiesta di Pascu
y pa celebrá nacemento di nos yiu. Boyo, pandushi, kuki, biña,
cucuy enfin tur cos pa brinda nos famiya y amigonan cu a yena cas pa bin
saludá nos....
Pachidú a trece ayaca y kalakuna tambe y orange..?
Ay no, Mayrita. E tempo ey nos no tabata tin placa pa cumpra e cosnan
ey. Ta awendia e hendenan a para bira ta come y bebe e co'i luhonan ey.
Bueno lagami sigui conta. Den un huki di cas Dichi a pone e bunita pesebre
cu el a trece for di Cuba. Aya banda ningun cas ta falta nan 'Nacimiento"y
Dichi a haya esey un bunita regalo di Pascu pa mi. Mi a pasa un Pascu
feliz. Pa gradicí San Antonio mi a pone e imahen di dje tras di
San Hose y tur aña mi a keda pone San Antonio den e pesebre.
Dichi a spar su ces bon na Cuba y cuné el a cumpra e cunuco cu
a duné suficiente ganamento y nunca mas el a sali bay traha 'fó.
Despues cu el a haya trabao den LAgo nos situacion a bira mihor, esey
ke meen cu nos no a pasa necesidad mas. Cada aña mi ta dorna e
pesebre y ta gradici Niño Hesus di nobo pa tur bondad y SAn Antonio
ta haya su lugar di honor den e pesebre. Mayrita awor bo sabi ta pakiko.
Machidú, esta bunita bo ta conta storia. Ni juffrou ta conta asina
bunita. Mi por hiza e radio poco awor?
Claro Mayrita, awe ta Pascu, dia di legria. Pero corda cu Pachidú
ta drumí.
Yen ternura Machidú ta braza su promé bisanierta y den sy
curazon e ta gradicido di por pasa un otro Pascu feliz, rondoná
di tur su sernan kerí.
|
