Su honor tabata grandi

Obedeciendo un decreto di Cesar, Maria y Hose, mescos cu hopi otro hende di Nazareth, a prepará nan biage pa bay Bethlehem, un pueblecito caminda nan antepasadonan a biba. Maria, un mucha muher humilde, tabata esun cu a woru scohí pa bira mama di e Salbador. Tur e lunanan aki Maria y Hose a biba cu nansecreto. Pronto mundo lo bai ricibí e regalo mas precioso, e Yiu di Dios mes.

Hose a haci tur preparacion pa e biaha dificil den e montañanan di Yuda. Na promé instancia el a preferá di laga Maria atras serca su mayornan, pero Maria a insisti pa compañele, sabiendo den su curazon cu ta Betlehem tabata e pueblecito cu lo ser e cuna di e Salbador.

Sintá riba burico ningun momento Maria tabata keha ni di frio ni di cansancio. Ya nan tabata tin cuatro dia na caminda y Hose su pianan tabata tur n'un blaar, tur su curpa tabata dué. Pero ora el a hiza su cara mira Maria asina feliz sintá 'riba e burico, el a lubida tur dolor y tur fatiga.

Maria, bo tin un idea di con bunita bo ta?
Cu un sonrisa dushi Maria a contesta:

Ay Hose, stop di haci chanza. Mihor bo bahá mi for di e burico aki, pa mi por bay laba mi cara y pianan na rio. Tambe mi ke camna poco. Esey ta mihor pa e yuchi. Tur e sintamento aki no ta bon pe.

Cu masha cuidao Hose a yuda Maria baha y a tene su man hibele na e rio. E tabatin miedo pa Maria no tromica riba e piedranan.

E awa di rio tabata enberdad refrescante..!
Ya solo tabata bahando y e biento a cuminza bira frio. E anochi ey nan lo drumi na Jericho y su mañan anochi nan lo yega Betlehem. Hose a cuminza preocupa un poco pa Maria, pasobra e tabata mira cla cu esaki tabata cercando su ora y ainda tabata keda nan un dia mas di caminda.

For di marduga Hose a siya su burico y a lanta Maria pa nan cohe caminda trempan, promé cu solo sali. E serena cu a cay tabata cubri e matanan y e flornan y un fragancia dushi tabata yena e aire. Tabata un dia precioso. Y pa tra'i merdia MAria tabata mustra cu e tabata cansá.

Animo, Maria. Ya no ta falta mucho mas pa nos yega. Bo Yiu lo nace na Betlehem, no tene miedo.

Pakiko tur ora bo ta papia di mi yiu, Hose?? Ta nos yiu! Bó ta esun cu a wordu scohí aki na mundo pa ta su tata. Ta bao di bo guia lo E crece bira homber. Ta bo lo ta su ehempel. Na promé lugar nan lo conocé como yiu di Hose carpinté. Dia su ora yega E mes lo revela na mundo ta kende E ta.Mientras tanto ta bo lo dirihi su prome pasonan y scucha su prome palabranan, mescos cu mi.

Maria su palabranan tabata manera bálsamo pa Hose su curazon. E ultimo lunanan e tabata tin hopi dificultad pa custumbra cu e idea cu Maria tabata spera un yiu cu no tabata di dje. Un yiu pa obra di Spirito Santo..!
Hose a tuma Maria den su brazanan y a caricié. Nan por a ripara cu nan tabata yegando Betlehem, pasobra di tur parti hendenan tabata baha purá riba caminda grandi cu tabata conduci pa e pueblecito.

Maria a cuminza ta sinti su mes malo, pero tabata haci tur su esfuerzo pa Hose no ripara nada. Nochi tabata cercando y aki aya ya algun strea a parce na e firmamento. A figura Maria cu nunca promé el a mira e cielo di Israël asina bunita. Esaki ta un anochi cu lo no tin su igual den historia di humanidad, Maria tabata pensa. Hose, mirando cu Maria tabata tembla di fio atira su mantel rond di su schouder y a bisa:

Curashi Maria, ya nos ta yegando. Mira, ata nos ta weita e luznan di e casitanan caba. Asina nos yega mi ta bay busca un bon lugar di drumi pa bo. Pasenshi, mi amor......

E tabata paia asina yen ternura, cu MAria a haya gana di yora pa tur e molester cu e tabata causé. E cayanan di Belehem tabata yen di hende, camel y burico.
Apenas Hose por a haya pasada pa e burico cu su carga precioso. Awor mas cu nunca Hose a comprende cu e tabata e proctector di MAria y su Yiu. E promé posada cu el a weita el a drenta pa bay busca lugar pa nan pasa nochi.

No tin lugar. Y mi ta consehá bo di no molestia bo curpa, pasobra tur e posadanan ta yen. Podiser bo por purba un of otro cas particular, e doño di e posada a contesté.

Hose no a perde animo y a pasa porta pa porta pa busca un lugar di drumi. Ma tur su esfuerzo tabata envano. Su tristeza y desesperacion a poné bolbe bay purba na e promé posada. E posadero cu a haya duele di dje a bisé:

Mira, pakiko bo no ta psa e anochi aki den un di e cuebanan pafor di Betlehem? Nan ta limpi y awacero no ta muha boso y tampoco boso lo pasa mucho frio. Mañan den dia lo bo por sigui informa pa un lugar pa bo y bo señora esposa.
Hose a mira cu no tabata kedé otro cos y el a bay hunto cu Maria na busca di un cueba. E por a muri di berguenza cu ta esey tabata tur loke e por a ofrece Maria. Pero Maria den tur humildad a sigui Hose y hunto nan a drenta den un di e cuebanan, caminda e beduinonan tabata hiba nan rebañonan ora di mal tempo.

Hose a cende un lanterna y acuminza prepara un lugar pa Maria drumi mas comodo posibel. Tambe el a cende un candela pa keinta e cueba. For di un pesebre el a saca poco yerba pa e burico.

Hose mi ta kere cu bo mester bay busca un partera. Mi ta kere cu e Yiu ta biniendo.

Hose a lanta purá pa bai den pueblo, pero na mes momento e a tende Maria dal un grito cu a paralizé.

Hose, mihor no bai. Mi tin miedo. No lagami só..! Para maske ta na entrada pa mi weita bo. Mi sa cu segun nos leynan bo no por asisti mi na parto, pero bo compania ta mi consuelo na e momento aki.

Maria, mi ta pidi un di e cuidadornan di carné aya fó pa bay den pueblo pa busca un partera. Mi ta bolbe unbez mi amor, no flihi.

Purá Hose a sali pa busca yudanza. Maria a keda tras den su dolor. Na mes momento el a corda cu esun cu tabata bay nace ta Yiu di Dios mes. Nada lo pasé. E no tabatin nada pa teme. Y si ta hose mester a yudé pa trece e Yiu na mundo, maske ta contra ley di Israël, esey lo mester a sosodé. Ora ora e tabata tende su mes voz tabata klink (sona) den e cueba. Ya e no tabata tin miedo mas. Yiu di Dios tabata a punto di nace y e lo ta un mama feliz, mes feliz cu tur mama na e momento di duna luz

Hose a bolbe.

Si e partera no yega na tempo ta bo mes lo mester yuda mi, Hose. Lo mi indica bo tur cos. Hose a cuminza haci e preparacionnan segun Maria tabata indiké. Maria den su dolor apenas por a mira si Hose tabata sigui su instruccionnan...... E tabata keha di dolor, sodor tabata baña su frenta...... un esfuerzo mas y e grito di e Yiu a yena henter e cueba. Cu mannan tembloroso Hose a corta e cabuya di lombrishi, manera MAria a spliké. Djei el a cohe e Niño cu somo cuidao, a limpia su curpa y a loré den paña.

Pa di proé bez un ser humano a tene den su brazanan, e Redentor. Hose su pecho tabata casi na rementa di felicidad. Yen di amor el a pone e Niño den braza di su mama feliz. Y el a prepará e pesebre cu tabata den e cueba, pa sirbi como wieg (cuna) di e Niño.

Cu gran devocion Hose a cay na rudia pa adora e Yiu di Dios, e Salbador di mundo.

Pabien Maria, awe mi ta sintimi e homber di mas dichoso na mundo, esposo di Mama di Dios, tata Wardador di Hesus.
Enberdad mi honor ta grandi...!
Nos Yiu ta maraviyoso, mi amor.....

Asina e anochi ey Dios a cumpli cu su promesa na humanidad.

Texto: © Digna Laclé-Herrera, nov. 1975
Derechonan reservá: Digna Laclé-Herrera
Nada for di e texto aki por wordu copia di un manera ò otro sin autorisacion antemano di e autora.