|
"Mama" e aña aki nos ta pone un kerstboom?
Mi no ta kere, Wancito. Papa no tin trabao y e kertsboonnan ta masha caro".
Un poco tristo Wancito ta kita for di e bentana pa e no sigui weita e
autonan cu ta cargá di kerstboom. E ta corda ariba tur e adornonan
bunita cu mama tin wardá den kashi.
Tambe un pesebre chikito. E balanan di tur color. E luznan cu ta cende
paga, blauw, berde, corrá.
Awa ta yena Wancito su wowonan. Ya ta hopi dia caba e ta tende Mama ta
keha. No tin placa p'esaki, no tin placa p'esaya. Tur dia Papa ta sali
mira kiko e por haya pa haci, pero tur dia e ta bolbe cu un cara tristo.
Nada!
Dos
dia promé cu Pascu Wancito ta mira Mama saca e caha cu e pesebre
for di den kashi. Wancito ta bira contento. Por ta cu Mama ta cumpra un
kerstboom toch?
"Wancito,
stoffia e pesebre y poné ariba mesa. E aña aki nos no tin
kerstboom, pero e pesebre sí nos ta bai dorna cu mata y flornan
fo'i den hoffi. Ta fiesta di Niño Hesus y ta pesey nos ta dorna
e pesebre."
Wancito
ta fluit un cantica di Pascu mientras cu e ta haci loke Mama a mandé.
Ki contento el a bira ora cu el a mira con bunita e pesebre a keda dorná
cu e mata y flornan. Anochi di Pascu Mama lo cende e belanan.
"Wancito
bo a haci un bon trabao. Esta netji e pesebre ta! Bay baña awor
y corda cu cuat'or bo tin di bay train cantica di Pascu den misa."
Esey Wancito no ta lubidá, pasobra e ta gusta canta mashá.
E tin un boz mashá bunita!
|
Den
misa e pesebre grandi ta poní caba meymey di hopi kerstboon. E
Niño den su baki ta hari cu Wancito.
E otro muchanan di e koor no ayega ainda y ta pesey Wancito tin tur tempo
pa e para waak e pesebre.
Den esey e ta ranca careda bay cas. For di den kashi e ta saca e caha
cu e adornonan y purá e ta bay misa bek cu e caha duro tení
bao di su braza. Un pa un e ta cuminza saca e balanan. E ta scohe e kerstboom
cu ta mas pegá cu e Niño y ta dorné cu tur e cosnan
bunita cu tin den caha.
"Niño Hesus, esaki ta mi kerstboom cu mi ta dorna special
pa Bo. Con bo ta haya e balanan aki? Nan ta lombra bunita, no? Na cas
nos no tin mata e aña aki. Pero lo mi bini tur dia bin sinta cerca
Bo pa mi tambe por goza di mi kerstboom dorná special pa Bo. Y
mañan anochi lo mi canta mashá bunita pa bo, ora cu tur
e luznan ta cende tur color y e balanan ta briya."
Asina Wancito a pasa su Pascu feliz, gozando di su kertsboom den misa.............
|
