Digna
Laclé
For di edad di 16 aña el a cuminzá traha den enseñaza, siguiendo e diferente cursonan pa completá su formacion como educadora.
Su interes y amor pa nos idioma Papiamento e ta considerá como un herencia di su mama kende tabata gusta conta su yiunan storia.
Papiamento
na scol tabata severamente prohibí y esey DML tabata considerá
un inhusticia, pero el a sabi di tene su mes estrictamente na laga Papiamento
pafor di scol.
E ta lamentá cu asina hopi oportunidad a bay perdí pa DML
a hinca den su alumnonan e amor profundo pa nos idioma Papiamento cu e
mes tabata sinti.
Rond
di añanan 70 el a cuminzá na publicá algo di su proza
y poesía, pasobra algun amigo a pidié esey. E publicacionnan
aki nunca a yega na bira un coleccion den forma di un buki. DML tabatin
e deseo si pero tur cos a keda den lachi. Sinembargo DML ta considerá
cu el a alcanzá un di su metanan cual ta: 'mas y mas Papiamento'
ta haya e respet y aprecio cu e merecé como algo cu ta distinguí
nos como un pueblo cu hopi cultura.
Danki na corant y revistanan cu a publicá su proza y poesía
DML a haya publicidad.
Via un programa radial na Corsow señor E. Pietersz Heyliger a haci
e pueblo di Corsow conocí cu proza y poesía di DML.
E programa "Echa palabra" un programa cultural a duna asina
hopi publicidad rond di e persona de DML pa loke ta trata su trabow riba
tereno di literatura.
Na Aruba tambe e revista "Matinette" cu ta un revista pa mucha
a pu-blicá hopi storia original di DML y un version di DML di e
"sprookjesnan" mas conocí den literatura mundial.
Propósito
E
añanan di nos hubentud ta esnan cu ta laga mas impresion atras.
Nunca mas mundo lo presentá su mes na nos den e forma maraviyoso
aki. Durante di e añanan aki nos ta cria custumbernan, nos smaak
ta desaroyá y nos personalidad ta wordu formá.
Un mucha tin un interes enorme pa siña, e no conocé prehuicio
y ta busca semper e berdad den tur cos y ta experenciá mundo como
algo fantástico. E ta dirigí su mes na tur loke ta bon y
bunita. Ta pesey e merecé lo mehor.
Saliendo for di e pensamento aki nos lo kier introducí nos muchanan
den en mundo literario pa trece nan den contacto cu un parti di lo mas
beyo cu literatura universal a producí.
Y ta den cual idioma nos lo por logra esaki mihor cu den nan propio lenga?
No ta den e lenga cu cual nan mama a forma nan mente infantil?
Un mihor conocemento di nos idioma Papiamento lo siñanan stima
y apreciá lo cual ta lo mas elevá di nos cultura.
Un
seleccion di cuentonan di hada, fábula y compilacion di e mihor
storianan scirbí pa mucha lo mester sirbi pa stimulá e imahinasion
di nos lectornan hoben e incitánan pa sigui interesá nan
mes pa obranan literario.
E experencia cu nos muchanan lo haya via bukinan ta algo cu nos mester
dunanan como herencia cual nan tin derecho riba dje.