Señor huez , t'ámi a mata e enano y a pone dilanti porta di Salim, pasobra cu mi tabata tin miedo di Polis.
E enano tabata un ladron cu mi a haya den mi cas sintá na mesa ta come pan. Mi a rabia mashá y a dale benta for di e stul y el a muri.

Asina ta cu bo tabata rabiá y bo a dal e pobercito enano y a maté....!
Wel lo mi mester laga horca abo... !
E dokter, kende tambe tabata presente a lanta para y a bisa:

"Señor t'ami a pone e enano den Abdul su cas, el a cai for di e trapi dilanti di mi cas. Mi ta un dokter. Lo tabata algo desatroso si nan haya e cadaver dilanti di mi porta. Mi ta culpable di su morto."

Si ta abo ta culpabel, anto ta abo lo mi mester laga colga......!

Na e momento ey Ali Rezzak a lanta para y a bisa:" Ta mi ta esun cu a pone e enano dilanti di porta di e dokter, mi a invita e enano bin come y el a pega cu un wes' i pisca y tabata muriendo. Mi no tabata kier pa el a muri den mi cas. Mi tabata tin miedo di Polis, ta pesey mi a cargué bai poné na porta di e dokter. Despues mi a core bai..........

E tabata muriendo y tog bo no a yama dokter pé, asina ta cu ta abo ta e culpabel di su morto, bo castigo lo ta palo di horca.... !

E Visir cu tambe tabata presente a bisa: "Señor, bo no por laga colga cuatro homber pa morto di un homber.
No mi no por haci esey, pero ta cual di nan lo mi horca...?

Lo mi colga Ali Rezzak pa motibo cu e homber tabata muriendo, pero e no a busca e dokter pé, o lo mi laga horca e dokter , pasobra cu te a haci cu un homber muribundo a cai for di trapinan di su cas.
Lo mi castigá Abdul cu a dalé of Salim kende a skop e enano tiré abao de caya causando asina su morto esta si e no tabata morto caba…………."

Scheherazade a stop di conta su storia aki y e Sultan a puntré: "Wel ta cual di e hombernan e huez a laga horca....?

Scheherazade a waak pafor y a bisa: "Mira, solo a sali, mi no por sigi contabo pasobra mi mester muri asina ta bo mes mester busca pa haya sa e final di e storia………..!"

Mañan bo ta contami e final....!

Su mañan Scheherazade a siqui conta e Sultan e storia, net na e momento cu e huez a caba di papia e Visir di e Rey di Kashgar a drenta cu e dokter di e Rey.

E Visir a bisa: "Un di e sirbientenan di mi Rey a perde. Nos ta pidi yudanza di boso pa buské. Ela sali for di cas ayera y nos no a miré mas. E tabata canta pa e Rey y tabata conta storianan cu tabata pone e Rey hari. Rey ta masha rabiá y a bisami cu nos mester haya e homber pronto.......!"

Tin cantidad di homber den e ciudad aki cu ta canta y conta storia. Ta con bo ta kere cu nos ta bai haya esun cu bo ta buska...?

Si, pero no ta tur ta enano...! Un enano...?

Si bo bai waak den e otro camber lo bo weité talbez.
O, esaki si ta un cos tristo......... !

E Visir cu e dokter a drenta den e otro camber. Si ta e mes. Ta kiko a causa su morto....?

Un wes 'i piscá .
Asina ta cu lo ta e weso lo mi mester castgá.

Lagami weita e weso. E ora ey lo mi sa si Ali Rezzak a papia e berdad.

E dokter di e Rey a samina e enano. El a habri su boca y a bisa: "E no ta morto. Pone bon atencion...! Ora cu mi saka e weso for di su garganta lo e bira bon atrobe...!"

E dokter a saka un instumento for di den e maletin cu e ta carga tur ora. Djei el a habri e enano su boca y cu e instumento el a saka e weso for di den su garganta.

E enano a habri su wowonan y a lanta sinta.

E Rey di Kashgar a regalá su dokter cincuenta moneda di oro.

Solo a sali Sultan, pues mi no tin tempo mas pa contabo un di mi storia nan di mas bunita.

Esta e storia di Aladin y su lampi magico.

Dinarzada, mi ta kere cu abo lo por conta e Sultan e storia aki, pasobra e ta un storia hopi conocí.

Mi a yega di tende e storia ey, pero mi no ta cordé mucho bon mas.

Wel …….Scheherazade, ta bo mes lo mester contami e storia aki mañan....!