Un dia un homber masha rico a sali pa hasi un biahe largo. El a hiba cuné un macuto jen di fruta y pan pe come na caminda. Solo tabata kima hopi y despues di a cana basta el a dicidi di bai sinta bao di un palo banda di un rio. El a cai sinta y a cuminzá come e frutanan. Mientras cu e tabata come e tabata tira e pipitanan tras di su lomba. Ora el a caba di come el a bai laba su cara y su mannan den e rio. Diripiente el a mira un genio su tras. E genio aki a grité:

"Lanta riba, lo mi mata bo mescos cu bo a mata mi yiu."

Pero con bo ke mata mi mientras cu mi no a haci nada e homber rico a contestá.

"Bo a mata mi yiu!"

Pero di ki manera mi por a mata bo yiu siendo mi no a weité!

Sintando bao di e palo ey bo tabata come fruta for di den bo macuto y mientras bo tabata come bo tabata tira e pipitanan tras di bo lomba. Na momento cu bo tabata tira e pipitanan bo tras, mi yiu homber tabata pasando y un di nan a dale den su wowo y el a muri. Ta pesey ábo tambe mester muri!

No tabata mi intencion pa maté. Corda riba mi casá y mi yiunan. Kiko nan lo haci si bo mata mi? Mi tambe tin un yiu homber. Ken lo mira pa mi pober yiu huérfano e orey?

Scheherazade a mira door di e bentana y a bisa:
"Mira! Solo ta saliendo. Mi mester stop."

Djey Dinarzade abisa:
"Mi ruman stimá contá mi e final."

Mi no por conta bo e finan pasobra awe mi mester muri. Si Sultan laga mi biba un dia mas lo mi por contá bo e final.

Ora e Sultan a tende e cos ey el a bisa: "Lo mi warda te mañan pa mi por tende e final di e storia."

Pa su mañan prome cu salida di solo Dinarzade a bisa:
"Ruman stimá si bo ta lantá mi ta pidi bo sigui cu e storia."

Y e Sultan a bolbe bisa: "Si, mi tin gana di tende e final di e storia…"

E ora ey Scheherazade a dicidi di sgui conta e storia……………E homber rico a mira cu e genio tabata tin intencion di kita su garganta afó. Pesey el a bisa e genio, mi ta suplicá bo pa duna mi tempo pa bai mira mi casá cu mi yiunan y regla tur mi asuntonan.

Despues lo mi bolbe na e lugar aki. Cuanto tempo bo mester e genio a puntra! Un aña...! Lo mi ta bek na e lugar aki, awe un aña. Esey mi ta priminti bo sin falta……

Ta bon anto, …..mi ta acceptá.

E homber rico a bai cas y a conta su casá kiko a pasa. El a regla tur su cosnan y despues cu un aña a pasa el a sunchi su casá, su yiu homber y a sali pa bai na e lugar caminda el a mira e genio pa e promé biaha. Mientras cu e tabata sintá, wardando ariba e genio el a weita un homber bieu cu un biná ta yega na e lugar. E homber bieu di cu ne:" Ta con biní bo na e lugar aki caminda cu tin tanto spirito magico...? E lugar aki ta masha peligroso………."

E homber rico a conté henter su historia.
Despues di a scucha cu atencion e bieu a bisa: "Ay, mi mester keda pa mira kiko ta pasa ora cu e genio bini……"

Asina ta cu e homber bieu a cai sinta bao di e palo wardando riba loke tabata bai sosodé.

Despues un otro homber bieu a pasa cu dos cachó pretu. Ora cu e di dos homber bieu a tende e storia el a bisa: "Mi tambe mester keda pa mira kiko ta pasa ora cu e genio bini….."

Nan a warda y djei nan a mira un nubia mescos cu un nubia di stof. Ora pa ora e tabata yega mas cerca. Den esey e nubia a habri y nan a weita e genio. E genio a bisa:

"Lanta riba...! Lo mi matabo mescos cu bo a mata mi yiu..!"

E homber rico y e dos hombernan bieu a cuminzá yora. Despues e homber bieu cu e biná a cai na rubia na pia di e genio y a bisa:

"Scuchá mi, mi ta rogá bo o genio...! Mi ta bai contá bo e storia di e biná aki cu mi ta guia. Si bo ta gusta e storia aki mi ta pidi bo pa duna e homber rico mitá di su bida bek….. Y podise e otro homber bieu aki tin un bunita storia riba su dos cachonan pretu. Si bo gusta e storia ey tambe lo bo por duna e homber rico e otro mitá di su bida bek y asina duné su libertad.....?"

Wel, ……..di acuerdo…pero e storianan mester ta bon mes,….. hahahaha……