5. E kalif y e limosnero ciego di Bagdad, di tres parti

Na e momento ey e baranca a habri y Baba-Abdalah a core drenta e cueba. El a yena un saco cu placa di oro. El a mira cu e Dervisch tabata yena e saco cu prenda y Baba-Abdalah a pensa: Esey ta mihó. Mi por carga mas prenda cu oro riba micamelnan. Asina lo mi haña más placa bendiendo tur e prendanan. Porfin tur e camelnan tabata cargá y nan tabata clá pa sali.	Na e momento ey e Dervish a bai na un caha grandi di oro , te patras ayá den e cueba. El a saca un caha chikito di palo afó. Despues el a pega un candela y a tira un puyru mágico aden. Mientras cu e tabata pronunciá algun palabra mágico e baranca a cuminzá sera. E cueba a keda será mescos cu e tabata na principio. Cada un a tuma cuarenta camel y a sali bai. Nan a yega na un lugar unda e caminda tabata parti na dos. Un tabata bai pa Balsore y e otro pa Bagdad. Baba-Abdalah a gradici e Dervish cu el a yudé pa haña tur e oro y prendanan y a deseé un bon biahe y hopi felicidad. Despues cada un a sigui nan caminda......... Apenas Baba-Abdalah a camna poco ora el a bisa den su mes: Ta pakiko un Dervish kier tur e rikeza ey.....? E no mester di hiba tur esey. E sa con pa habri e cueba y asina e por bai busca oro cuanto cu e ke y ki ora cu e ke............. El a para e camelnan y a bolbe cerca e Dervish y a bisé :	'Mi ruman bo ta un Dervish. Bo ta hiba un bida sosegá cu e único deseo di hasi bon na otro. Cosnan di mundo no tin balor pa bo. Tur e rikeza aki lo ta un peso pa bo mente y un motibo di tristeza pa bo. Y pensa esaki tambe bo no sa con trata un camel....!" Si bo ta sabí bo ta tuma no mas cu trinta camel y ainda lo bo tin hopi trabao pa manehá tanto camel asina......... Bo tin razon...! Mi no a pensa esey. Bai cu diez di mi camelnan......! Baba-Abdalah a scohe e miho diez nan y a bai bek cerca su cuarenta camelnan. El a wak atras pa mira con leu e Dervish tabata , pero e no a bai mucho leu pasobra e no por a dirigí e camelnan. Como tabata asina facil pa Baba-Abdalah a kita e diez camelnan for di e Dervish el a dicidí di pidié mas... Baba a grita : "Mi ruman, mi mester bisabo cu ta mashá bon manehador di camel bo mester ta pa bo trata cu trinta camel. Mihó bo duna mi diez mas...... El a duné nan y e tabatatin sesenta camel....!
Texto: ® Digna Laclé-Herrera Derechonan reservá: Digna Laclé-Herrera Nada for di e texto aki por wordu copia di un manera ò otro sin autorisacion antemano di e autora. Promé version na papiamento 1993, Edicion revisá : 1994 Danki na sra. N. Hoevertsz cu a typ tur e storianan