8. E princesa y e tres ruman hombernan, promer parti

Un Sultan tabatatin tres yui homber : Husein , Ali y Ahmed. E Princesa Lila tabata yiu muher di e Sultan su ruman homber mas hoben. E ruman aki a muri tempo cu Lila tabata masha chikito. E Sultan a tumé, crié y asina el a crece hunto cu e tres principenan. E Sultan tabata kier pa Lila casa cu e yiu homber di un rey di un pais serkano. Pero el a ripara cu tur tres su yiunan tabata enamorá di Lila y cu nan kier a casa cu né. Y e Sultan ta puntra su mes, ta kiko lo mi hací..... ? Lo mi pidi Ali y Ahmed pa laga nan ruman Husein casa cu né. Ta con lo mi haci, bisa ta cual di nan lo casa cuné ? E Sultan a puntra Lila y esaki a contestá : mi ta stima tur tres. Laga nos hasi algo pa mira cual di nan tres ta stimámi mas. E Sultan a yama su tres yiunan y a bisanan pa cada un bai biaha durante un aña, pasobra e ta gusta cos nobo y bunita. Esun cu trece e mihor regalo lo casa cu e princesa Lila.	Djei el a duna cada yiu cinco cien plaka di oro. Boso por usa e plaka aki pa cumpra e cos di mas bon cu boso por haya durante e biahe. E tres rumannan a sali bai y e promé dia nan a yega na un lugar na unda tres caminda tabata contra cu otro anochi. Nan a bisa cu cada un ta scohe un di e camindanan pa sigui nan biahe pa un aña. Despues di un aña nan lo contra na e mesun lugar aki. Djei nan lo bolbe cas pa hiba e mihor regalo cu nan a haya durante di nan biahe pa e Sultan. Principe Husein, e ruman mayor a yega despues di varios luna na un lugar yamá Bisnager. Aya tabatatin hopi tienda y hopi caya. Tur e bendedornan di paña tabatatin nan tiendanan den un otro caya. Esnan cu tabata bende prenda tabata den un otro caya.Esnan cu tabata bende mesa, stul y cama tabata den otro. Asina ta cu cada grupo di bendedor tabatatin nan propio caya. Husein a camna den hopi di e cayanan. El a mira cantidad di cosnan bunita y util. Nunca promé el a mira cosnan asina bunita. El a pensa cu su tata lo keda contento cu hopi di e cosnan aki, pero podiser loke Ali y Ahmed ta bai hiba pe ta mucho mas mihor. E mester hiba algo cu ningun di nan a yega di mira promé. E mester ta algo unicó den mundo. Un dia camnando den e cayanan, el a yega den e caya di e bendedornan di tapijt. E tabata mashá cansá, el a cay sinta dilanti di un shop mashá chikito.	E doño di e shop a bin pafó y a puntra ta kiko asina e ta deseá di cumpra. Principe Husein a puntré si e tin e mihor tapijt na mundo. Esta cu e mester ta único y no mester tin un otro igual cuné. Si.., e doño di tienda a contesté, mi tin e único tapijt Mágicó. Si bo sinta riba djé y bisa : Hibámi Bagdad , o Hibámi Damasco o Caíro o unda cu ta..., e tapijt lo hibabo, bulando den aire na unda cu bo ké. "Lagami purbé "...,Husein a bisa. " Mi ta bai cubó " ...,e homber a contestá. Y si e tapijt haci manera mi ta bisa, nos ta bolbe y bo ta pagami cinco cien plaka di oro pé. El a bai busca e tapijt. Esaki tabata masha chikito y bieu. Nan dos a sinta riba e tapijt y a bisa : Hibanos Damasco.......! E tapijt a lanta y ora pa ora nan tabata bula mas halto. Nan por a mira e pueblo cu tur su caya y tiendanan bao di nan. Tambe nan a pasa riba e riu Albana. Ban Caíro awor.....! Un rato despues nan tabata bula riba Caíro. Awo ban bek Bisnagar. Poco despues e tapijt a baha, pone nan dilanti di e tienda. Husein a paga e cinco cien plaka di oro, el a bisa sigur ni Ali ni Ahmed lo por haya algo manera esaki, esaki ta e único tapijt mágico na mundo.
Texto: ® Digna Laclé-Herrera Derechonan reservá: Digna Laclé-Herrera Nada for di e texto aki por wordu copia di un manera ò otro sin autorisacion antemano di e autora. Promé version na papiamento 1993, Edicion revisá : 1994 Danki na sra. N. Hoevertsz cu a typ tur e storianan