E princesa y e tres ruman honbernan, di dos parti

Ali a biaha durante cuatro dia y a yega den e pueblo Shiraz na Persia. E tabata biaha como bendedor di prenda. E pueblo tabatatin hopi caya y plaza cu un cantidad di tienda yen di cosnan bunita. Ma el a pensa cu hopi di e cosna aki lo por haya den un otro pueblo tambe. Si e cumpra algo ak , con e por haña sa si Husein of Ahmed no a haya algo mihor...?! El a yega na un tienda na unda nan tabata bende verrekijker, esta un aparato pa mira tur cos cu ta hopi leu, hopi mas serca. E verrekijkernan den e tienda tabata hopi bon nunca promé el a yega di miranan asina bon, pero tur captan di barco tin un verrekijker y podiser den un otro pueblo mi por haya mihó cu esakinan. E doño di tienda a bisa Ali : " Bisami ta ki sorto di verrekijker bo ta deseá y lo mi buské pa bo. Ali a contestá : mi kier e mihor verrekijker na mundo. No mester tin su igual. E doño di e tienda a bisé : "Poco dia pasá un homber bieu a pasa den e caya aki y e tabatatin un verrekijker pa cual e tabata pidi cinco cien placa di oro. E dí cu no tabatatin un otro verrekijker manera esey riba mundo."	Cinco cien moneda di oro pa un verrekijker ? Ali a grita. Ta ki sorto di verrekijker por bal e placa ey ? E ta un bon homber e doño di tienda a contestá . Si e bisa cu no tin otro verrekijker manera esey, e ta papia berdad. Mi ta hiba bo cerca djé. Nan a bai y e homber bieu a mustranan e verrekijker. Si bo wak door di dje, bo por mira kende y kiko bo ta deseá di mira, el a bisa. Ali a wak door di e verrekijker y a deseá di mira su tata. El a weité den hal ta conbersá cu e Visir. Awor mi ke mira Lila. El a weité ta keiro den hardin cu su amiganan, nan tabata hari. Ali a cumpra e verrekijker y a laga tumba pa bai contra cu su rumannan. Principe Ahmed a tuma caminda pa Samarkand. El a drenta den e tiendanan di paña, di tapijt, hoyería y hopi otro tienda. El a mira hopi cos bunita. Nunca promé ela mira tanto cos bunita asina. Pero podiser Husein of Ali lo haña algo mucho mas mihor cu tur e cosnan aki. E mester cumpra algo cu ta e mihor cos ariba mundo. Mientras cu e tabata sintá den e caya di e Hoyeríanan el a tende un homber tabata grita: "un appel.... !" Kende ke paga cinco cien moneda di oro pa e appel aki...... ? El a wak e appel y a bisa: "Si, mi ta mira cu e appel ta di oro, pero mi lo no paga cinco cien moneda pé..!" Pero e appel aki ta algo special ta un mago a trahé. E tabata un homber masha sabio. Si un hende ta malo y e hole e appel e ta bira bon. Di e manera aki el a salba hopi hende cu tabata muri.	Pero riba un dia el a bai haci un biahe largo y a lubida di hiba e appel cuné. El a bira malo y a manda un homber pa bai busca e appel. Pero e homber no a bai buské, ora cu el a bolbe ya e mago a muri.Hopi hende a conta Ahmed cu esaki tabata berdad. Nan a conta di nan esposa y yiunan kende nan e mago a salba cu su appel mágico.Ahmed a dicidi di cumpra e appel y a sali na encuentro di su rumannan. E tres Principenan a mustra otro loke nan a cumpra. Husein a wak door di e verrekijker di Ali y a bisa.. : "Mi kier mira Princesa Lila....". Den esey e la grita.... : Ali , mi ta weita cu Lila ta hopi malo, e ta muriendo. Nos mester bai un bez.. ! Ahmed a contestá, lo mi bai salbé cu mi appel mágico......! Pero ta con nos ta haci yega lihé cerca djé... ? Ali a bisa, e ta hopi malo. E por muri promé cu nos yega cerca djé. Nos lo bai cu mi tapijt mágico Husein a bisa. Nan tres a sinta riba e tapijt y pronto nan tabata den e camber di Princesa Lila. Principe Ahmed a tene e appel bao di su nanishi, el a habri su wowonan y a bisa su damanan, mi tabata na soño, mi ta bai lanta awor pa mi bisti mi paña. E tres principenan a sali for di e camber. Nan a bai cerca e Sultan.
Texto: ® Digna Laclé-Herrera Derechonan reservá: Digna Laclé-Herrera Nada for di e texto aki por wordu copia di un manera ò otro sin autorisacion antemano di e autora. Promé version na papiamento 1993, Edicion revisá : 1994 Danki na sra. N. Hoevertsz cu a typ tur e storianan