Un dia ta'tin un Rey na Persia yamá Kosrouscha. Tempo e tabata
mucha el a yega di tende nan papia di Kalif Harun AL Rahid.
El a tende con esaki tabata disfrazá na pididó di limosna,
y tabata camna asina den cayanan di e pueblo.
Kosrouscha a haña esey un bon idea y despues cu su tata a muri
y cu el a bira Rey el a bisa:
" Mi tambe ta bai bisti na homber pober y hunto cu mi Visir lo mi
bai camna den cayanan pa mi tende kiko mi pueblo ta comenta, opiná
y papia."
Un dia camnando den un caya masha keto el a mira un bentana habri.
El a wak paden y el a mira tres ruman muher sintá ta combersá.
Nan tabata papia di e homber cu nan lo a gusta pa casa cu né.
E
ruman mayor a bisa : Mi ta gusta come bon pan, lo mi a gusta di casa cu
e panadero di Rey. E homber cu ta traha pan pa Rey come.
E di dos ruman a bisa: Ami ta gusta bon cuminda, lo mi gusta di casa cu
e kokki di Rey.
E di tres ruman tabata masha bunita.Nunca promé e Rey a yega di
mira un mucha muher asina bunita. Su voz tabata masha dushi y suave, el
a bisa : Mi a mira e Rey ; e ta un homber cu bon tipo y mi ta kere cu
e ta un bon homber tambe. Ami lo a gusta di casa cu e Rey.
E Rey a drey bisa su Visir : Mañan bo tin di bin e cas aki y trece
e tres damitanan cerca mi.
E dia siguiente e Visir a hiba e tres mucha mujernan cerca e Rey.
E Rey a bisa nan : Boso ta corda kiko boso a desea ayera nochi ora cu
boso tabata combersá ? Mi tabata pará tras di boso bentana
y mi a scucha loke boso tabata papia.
Boso deseo lo keda cumpli. Abo lo casa cu mi panadero, abo lo casa cu
mi kokki.
Despues el a puntra e ruman di mas chikito : Bo kier bira mi esposa ?
Asina a sosode cu e dos rumannan mas grandi a casa.
Esun cu e panadero y e otro cu e kokki, e ruman di mas chikito kende tabata
yama Fátima a casa cu e Rey y a bira Reina.
E dos rumannan mas grandi a bira jaloers. Nan tabata bisa, ta pa kiko
ta cuné e Rey mester a casa ? Nos ta mucho mas bunita cuné.
Nos ta mas sabi també !
Pesey nan a traha un plan pa haci Fátima daño y haci cu
e Rey lo core cu né.
Asina lo e no ta Reina mas. Un aña despues nan a tende cu e Reina
pronto lo bay haña un bebi.
E rumannan a bai cerca e Rey y a bisé : Nos ta su ruman, laga nos
ta cerca e Reina ora e bebi nace.
Dje manera ey nan a keda cerca Fátima, e bebi a nace y tabata un
balente mucha homber.
E
dos rumannan a pone e bebi den un caha y nan a bai poné banda di
un riu. E awa di e riu a lastra e bebi hiba.
E dos rumannan a buska un cacho chikito y a poné den e wieg na
lugar di e bebi, nan a bisa e Rey cu esey tabata e bebi di Fátima.
E Rey a bira masha tristo y tabata masha rabia. Mientras tanto e riu a
carga e caha cu e bebi hiba te den e hardin di e Rey.
Un di e hardineronan di e Rey a haña e caha cu a keda pegá
den e yerbanan cu tabata crece banda di e riu.
El a hibé pa Jamil kende tabata cabezante di e hardineronan.
E tabata un bon homber , el a tuma e bebi y a hibé pa su casá.
Nan no tabata tin yiu y awor nan a dicidi di cria e bebi como nan propio
yiu.
Su aña sigiuente Fátima a bolbe haña un bebi, a pasa
mescos cu esun di promé.
E rumannan a bolbe cambia e bebi pa un cachó y a hiba e mucha chikito
pone banda di riu. Atrobe e riu a carga e caha cu e bebi hiba den e hardin
di e Rey, y Jamil a tuma e bebi aki tambe. Awor nan tabatatin dos yiu
homber.
E Rey tabata furioso pasobra cu e Reina no por a duné un yiu homber.
E Rey a bisa : Si e di tres yiu resultá mescos cu e promé
dosnan, lo mi manda Fátima bai.
|
E
di tres yiu tabata un mucha muher. E dos rumannan a haci mescos atrobe,
y e riu un biaha mas a lastra e caha pone den e hardin.
Awor Jamil y su casá a haña un yiu mujer pa nan cria.
E Rey a laga cera Fátima den un bentana pa caya y el a bisa. Laga
tur hende cu pasa weita e muher aki cu no por dunami un yiu.
E dos mucha hombernan a crece bira masha fuerte y balente.
Nan tabata parce principenan, nan tabata yama Bahman y Perviz, esey tabata
nomber di e Reynan di Persia den tempo bieu.
E mucha muher su nomber tabata Parizade.
Jamil a cumpra un bunita cas na campo y a laga traha un bunita hoffi rond
di dje .
Ora cu e saki tabata cla el a bai cerca Rey y a bisé, mi ta bieu
caba, mi ta deseá di stop di traha y bai hunto cu mi casá
y mi yiunan den mi cas na campo.
Algun aña despues Jamil y su esposa a muri, pero nunca nan a conta
Bahman, Perviz y Parizade cu nan no tabata nan propio yiunan.
Esakinan a sigui biba trankilamente den nan bunita cas. Un bon dia un
dama poko bieu a yega na e cas.
E dama a bisa.Ta ora di reza , mi por a drenta paden pa mi haci mi oracionnan
?
Despues cu el a caba di reza, Parizade di cuné : Keda come cu mi
y despues mi ta lagabo weita e cas y e hardin.
Ora cu e muher bieu a caba di weita tur cos Parizade a bisé:!
Bo'n ta haña e cas y e hardin aki ta esunnan di mas bunita den
mundo ?
E
shon bieu a contesté si e ta masha bunita, ma tin tres cos ainda
cu bo no tin. Nan ta e pahra cu ta papia, e ta papia mescos cu hende y
ta mashá sabí.
E di dos ta e mata cu ta canta : y e di tres ta e awa di oro. Traha un
lugar pa un fontein basha e awa di oro aden y lo bo tin un fontein cu
nunca lo seca y nunca lo yena bai over.
Pa
bo haña nan bo mester biaha durante binti dia riba e caminda cu
ta pasa dilanti di bo cas.
E promé persona cu bo topa bo mester puntré na unda bo ta
haña e pahra cu ta papia, e mata cu ta canta y e awa di oro.
Ora cu Bahman a bolbe anochi Parizade a conté tur loke e shon bieu
a bisé.
Lo mi bai busca e cosnan aki pa bo. Mañan mes mi ta bai , Bahman
a bisa.
Nó
, nó !
Parizade a grita , podiser tin peligro, mi no kier pa nada pasa bo.
Tuma e glas aki Bahman a bisa. Si mi ta salvo e glas lo ta limpi y ta
lombra. Si e ta humá lo bo sa cu mi ta na peligro.
Bahman a biaha durante binti dia riba e caminda, despues el a mira un
homber bieu sintá kanto di caminda y e dí cuné :
Señor mi a bini di leu pa busca e pahra cu ta papia, e mata cu
ta canta y e awa di oro.
Bo por bisámi ta pa unda mi mester bai ?
Si e homber bieu a contesté pero tin hopi peligro.
Bo ta mira e sero halto ey..., só pará... ? Bai na pia dje
sero ey, lo bo haña hopi piedra preto y lo bo tende voznan cu ta
papia malo cu bo y grita bo pa bai bek.
E piedranan ey ta hombernan cu a bai pa busca e pahra cu ta papia, e mata
cu ta canta y e awa di oro, pero cu a draai wak patras y e ora ey nan
a cambia na piedra. No wak bo tras.... ! Bai te na top di e sero, aya
lo bo haña e pahra cu ta papia y e lo bisa bo na unda bo ta haña
e mata cu ta canta y e awa di oro.
Bahman a yaga na e sero el a mira e piedra nan preto y a cuminzá
subi .
Den esey el a scucha e voznan cu tabata yamé, nan a zundré
, pero el a sigui subi.
Solo tabata kima y e caminda tabata duro. Un piedra a lora bao di su pia
y el a hera cai.
Ora cu el a lanta el a draai wak, awor tabatin un otro piedra preto mas
na pia di e sero.
Pirazade a wak den e glas, e tabata nubiá . El a comprendé
cu Bahman tabata den peligro.
Perviz a bisa : Nos ruman ta den peligro, mi mester bai pa judé.
Si ami ta den peligro anto e glas lo bira preto manera carbon. Pero si
mi haña mi ruman y mi ta na caminda pa cas cuné e glas lo
ta limpi y ta lombra.
Perviz a sali bai y a topa cu e homber bieu. El a puntra e homber : Bo
sa si mi ruman a pasa e caminda aki ...?
El a puntrá bo algo di e pahra cu ta papia, e mata cu ta canta
y e awa di oro... ?
|
Si
e homber bieu a contesté. Un yoncuman cu ta parce bo hopi a pasa
aki banda. Mi a indiké na unda e mester bai.
Mi a bisé pa no wak atras ora e ta subi e sero, pero el a hacié
tog. Awor el a bira un piedra preto.
Perviz a yega na e sero y a cumiza subié. El a tende e voznan pero
el a sigi .Despues el a scucha un voz su tras bisando : Bin bek, bin bek
!
Tabata e voz di su ruman. El a drei wak awor tabatatin un piedra mas na
e pia di e sero.
Parizade a comprondé awor cu tur dos su rumannan tabata den peligro
y el a sali pa bai salbanan.
El a bin topa cu e homber bieu. Esaki a bisé loke a pasa. El a
conté di e voznan y a bisé: No wak patras! Parizade a contesté
: Lo mi tapa mi oreanan cu catuna, asina lo mi no tende e voznan.El a
subi e sero y e voznan tabata tur rond di dje, pero e no a scuchanan.
Porfin el a yega na top di e sero y a mira e pahra cu ta papia.
El a saca e katuna for di den su oreanan y a bisa: Splicami na unda mi
por haña e mata cu ta canta y e awa di oro.
Atanan ey... ! E pahra a contestá. Bo no ta tende e mata ta canta
?
Kibra un stek y planté den bo hardin y lo e crece bira un mata
grandi.
Yena poco di e awa di oro den un botter y lo e bira un fontein den bo
hoffi.
Pero con mi ta haci pa salba mi rumannan?
Parizade a sclama.
Bo ta haña un potji cu awa banda di e mata .Hibé y basha
un poco riba cada un di e piedranan preto y nan lo bolbe cambia na hende.
Parizade
a bolbe na pia di e sero hibando e pahra, e stek y e botter di awa di
oro. Tambe e tabatatin e potji cu awa pa troka e piedranan na hende atrobe.
Awor Parizade cu su dos rumannan a yega cas feliz y contento.
Nan a planta e stek den hoffi y na a traha un bunita fontein cu awa di
oro. E pahra cu ta papia a haña un bunita haula di oro .
Di tur parti di e pais e hendenan tabata bin pa admirá e cosnan
bunita aki.
E Rey tambe a haña tende y a bin busca nan pa mira.
El a weita e fontein y e mata. Despues e dí cu e Visir : Mi ke
papia cu e doñonan pa mi haña scucha e pahra cu ta papia.
Bahman y Perviz a sali bin contra e Rey. Ora esaki a weitanan e Rey a
bisa : Pakiko e Reina no por a duna mi dos yiu homber manera esakinan?
Nan lo tabata tin mesun edad di e dos netji yoncumannan aki.
Ai, pakiko? Bahman y Perviz a hiba e Rey paden. Ora esaki a weita Parizade
el a bisa : E ta parce La Reina masha hopi mes.
Pakiko e no a dunámi un bunita yui muher asina ?
Parizade a hiba e Rey cerca e pahra y a bisa : Esaki ta e Rey por fabor
papia pa e tende.
E pahra a bisa: O.., Rey mi ta deseabo un bida largo y hopi felicidad,
Rey kier a puntra algo ?
Si e Rey a contestá bisami ta pakiko mi no por tin dos yui homber
netji asina y un yiu muher bunita manera Parazade ?
Ta bo yiu nan tur tres ta e pahra a contestá...!
Despues el a conta e Rey loke cu e dos rumannan malvado di e Reina a haci.
Puntranan... !
Ponenan confesá e berdad y laga e Reina mira su yiunan y hacié
bo Reina atrobe.
Asina e storia aki ta caba felizmente
Esey
tabata e storia di un Princesa y su dos ruman hombernan...
Mi
sa un storia di tres ruman homber cu kier casa cu e mesun Princesa.
Con Sultan por haña sa ta cual di nan tres lo haci e Princesa feliz
?
Podiser ya Sultan sabi e contesta caba ?
Nó , e Sultan a contestá.
Bo por contami e storia ey promer cu solo sali ...?
|
