"Luli, n' ta mihó bo bai mira si Pedrito a bin fo'i scol y si Wancito ta cuné? Ta cuat'or caba y ni coló di Wancito. Ta unda e much'i malora ey a keda. Ban mira si n' ta den un of otro problema Pedrito cuné ta atrobe. Pedrito ta birando un poco maldito den e dianan aki y Wancito ta siguié."

Luli ta pone su bukinan un banda y ta sali pa bay busca drechi di Wancito. E ta mira cu mama ta preocupá. Berdad ta cu Wancito cu su amigo Pedrito ta dunando un poco trobbel último tempo. E no sá ta kiko ta pasando. Varios bez nan ta bini cas laat y mama no ta gusta esey. Luli ta mira Tantan den curá ta habri paña na cabuya. Pober Tantan..... Ora e sali for di trabao ainda e tin su mes trabaonan di cas pa haci. E ta traha duro.

"Tantan bon tardi, Pedrito ta na cas?" "Luli bo sá, ainda e penci ey no a yega. Awe sí mi ta kere cu mi ta duné un sota. Cada bez e ta sacami un cuenta, cu e mester yuda meneer, e mester yuda juffrouw, e mester yuda Pastó. M'a bisé cu mi no tin nada contra, basta cu eta percurá p'e ta na cas cuat'or y no busca trobbel. Weit'e último biaha cu Wancito cuné a bai yuda Pastó, ata nan a kibra e imahen di San Martin di Pers. Pastó mes no a worry pasó e dí cu ta e nmihó manera pa libré di poco Santo den misa. Pero e debotonan di e Santo akeda masha mal rabiá. Ma nan mester sa cu muchanan djawendia ta mashá wild. Un ta mané temp'i nos tem.' Pero Luli, mi ta lagábo para numa. Bon ta drenta?' "Nò Tantan, mi mester bai siña mi lesnan y despues bari cas."

Net cu Luli ta bira bay at'e ta weita e "dogcatch" di polis ta yega para dilanti nan cas. Un polis ta baha y ta habri e porta patras di e auto. Purá e ta core pa bay mira ta kiko a sosodé. Sigur ta un desgracia Wancito a haya! Pero nò, at'é ta mira Wancito y su tras Pedrito ta baha for di e aut'i polis. Mama ta core man na cabez ta bin afó.

"Hesú meneer, ta kiko mu yiu a haci? Ta di con meneer mester a poné den dogcatch trece cas? Ay est' un berguenza.

Wancito mi yiu ta ki b'a haci?" "Nada, mama". "Nada?!!..." Anto polis mester trece bosonan cas?!"

"Señora, trankilizá. E muchanan no a haci nada malo te asina leu cu nos sa.
Simplemente nan a pidi nos un cabey 'boto. Y ata nos a trece nan.
Nos a topa nan dos na camind'i Ponton ta pidi lift. No ta nos custumber pero como kiera cu mi conocé Pedrito nos a dicidí di para pa puntrnan ta kiko nan ta haci aya banda. Ponton t'un bon pida fo'i Dakota. Nan di cu ta pa e wandelmars di otro siman nan ta train. Ma como cu nan mester ta na cas cuat'or nan a dicidí di pidi lift."

"Pedrito pura, bo mama ta wardábo. Meneer, mi mes lo splica su mama ta kik'a pasa. Pedrito, bisa comèr cu mi mes ta bini. Prepará bo lomba. Wancito pasa paden. Lo mi regla cuenta cu bo.

Meneer, n'sa ki susto m'a hiba ora m'a mira aut'i polis dal pra dilanti mi porta. Kiko bisiñanan lo pensa!" "Señora, no preocupá cu esey." "Danki antó meneer y mi ta spera cu esaki lo no sosode mas. Mi ta bay duna Wancito un bon castigo. Di susto mi a haya batiment'i curazon......" "Pero mama, ta pa via cu mi no tin oloshi mino por a weita ora, Wancito ta protestá." "Bo ke meen cu mi mester cumpra oloshi tambe? Y unda lo mi sak'e placa? Ademas ta ki mishí bo na camind'i Ponton. Y ta ki cuenta di train pa wandelmars tin?"

"Ta Pedrito a pensa cu si nos train e caminda, sigur nos ta gana premio." Atrobe Pedrito....! Pedrito a pensa..., Pedrito a bisa..., Pedrito a puntra... Y Kiko bo mes ta haci?" "Ami ta bay di acuerdo. Esey ta nificá accoord. Ora meneer ta bay haci un cos den clas semper e ta ountra sinos ta accoord. Ora nos ta gusta nos ta bisa sí, ora nos no ta gusta nos ta bisa nò." "Meneernan djawendia ta mors mucho cu boso. Mi no ta kere cu lo mi mester puntrábo si bo ta "accoord" cu bo merecé un bon straf. Pero laga bo tata bini pa mi conté, mira si e ta di acuerdo.

Bay laba bo man y ata bo té cu lechi riba mesa. Awor l'e ta frieu manera aw'i barí. Esey ta pa siñábo cu bo mester ta na ora...." "Pero mama,......." "Y corda cu bo tin bay cumpra pan". Cu un cara verdriet WAncito ta sinta bebe su té. Diripiente e mester hari cordando kiko e muchanan na scool lo bisa mañan ora nan conta di nan "carijtje" den dogcatch.