Señor, nan di cu den Bo nomber nan a bin pa predicá amor, amor pa Cristo, pa bo ruman, amor pa blanco y p'e Indjan, y den nan man un cruz enorme como símbolo dje gran berdad e único cu lo trece felicidad.

Yen di euforia Colon a grita: "Na Bo gloria o mi Señor", y aki a cuminzá mi gran dolor, tragedia di un raza noble cu un cultura avanzá y elevá, historia tristo di mi pueblo cu tin mi alma tolondrá.

Señor, por yama doctrina di amor loke lacayonan dje gran conkistador a bin sembra den e curazon humilde di e indjan cu a soportá y sufri tanto teror, violacion, humiliacion di e donceya cu inocentemente a wordu engaña......?

Cinco cien aña di usurpacion, di destruccion di un cultura. Santo, Santo, Santo Bo ta Señor, hosana den altura, ma aki bao mi alma erante den selva y cordiyeranan ta sclama y ta pidi husticia y piedad, buscando yen angustia y amargura na unda e por contra e gran berdad.