|
Na bispo di su salida pa su isla natal Pajan tabata sintá ta pensa
riba su añanan di hubentud.
Loké mas ta yené cu alegria ta cu pronto lo e bay tin chens
di keiro den cunuco di Padushi y bay piki shimaruco. E mata lo t'ey ainda
? Nan lo a kap e of e mes a muri di bieu....?
Hoffi di Dolorita, asina Padushi a yama e cunuco, na honor di Machi Do,
nos wela.
Padushi
y Machi Do no ta na bida mas y e yiunan a preferá di bende e cunuco.
Pajan mes no tabata mucho na altura di esey , ya cu su mayornan mes ta
biba na Hulanda
pero masha poco nan tabata papia di e asunto ey. Mayan lo e bay pasa vakansi
pa un par di siman y pronto lo e haya sa mas di e Hoffi di Dolorita.
E palo di shimaruco..... Cla e ta weité cargá di e frutanan
corá ta lombra como si fuera ta di glas nan ta trahá . Pero
e olor dushi cu nan tabata plama tabata bisa bo bon cla cu ta e frutanan
cu e olor mas dushi ta colgá ey y ta invitá bo pa ranca
nan. Algo cu no tabata facil pa haci pasobra e maribombanan cu tabata
den e mata no tabata duna bo un chens.
Pero Padushi semper tabata huma bao di e mata pa core cu nan pa asina
por a piki cuanto shimaruco cu tabata ké.
E
mata di shimaruco ey tabata un mata mashá stimá pa Padushi.
El a planté dia cu Pajan su ruman muher Rita a nace, su promé
nieta. Segun cu e mucha tabata crece e mata tambe tabata crece. Padushi
tabata bisa cu nan dos tabata pusta den buniteza, e mucha y e mata!
Dia
cu e mata a pari su promé frutanan ta Rita tabata tin mag di kita
e promé frutanan for di e mata. Esey a keda un tradicion den famiya,
cu tur aña Rita tabata e promé pa baha e frutanan.
Den
e cunuco tabata tin també mata di guyaba, di cashu , di tamarein,
di mispel, di kenepa y di mango, tur bon cuidá, pero ta e mata
di shimaruco tabata haya mas cariño y atencion. Y parce cu e mata
tabata sinti e amor ey, ya cu e tabata bonda y florea na un manera excepcional..
Su frutanan tabata grandi y dushi.
|
Tur
Pajan su amigonan tabata haya un calbas yen shimaruco regalo.
Machi Do tabata traha un calidad di zjilea masha dushi mes cu e frutanan.
Zjilea di shimarucu ! Mmmm. Pajan tabata gusta come e zjilea den pan.
Den su pensamento Pajan a recoré e cunucu y tabata mira cada mata
cla su dilanti.
E palo di watapana caminda Padushi tabata mara su burico.
E watapana tabata berde bunita, cu su foyonan manera kanchi. E tabata
un mata cu a crece den tur su buniteza sin cu e biento a haya chens di
maltraté y poné crece corcobá.
Bao
di e palo di tamarein Pajan a hunga feliz cu su ruman, primo y amigonan.
Nan tabata come tamarein berde y hecho te haya doló di barica.
Pajan tabata corda e guyabanan cu tabata colga manera balanan di oro y
tabata briya den e solo. E palo di kenepa tur na flor, pero cu nunca a
carga fruta , ma si tabata atraé miles di abeha.
Recuerdo
, recuerdo y mas recuerdo…… Pajan tabata conta e oranan pa e
pisa suela di su dushi Isla !
Na
momento cu e avion tabata bay aterizá Pajan a wak pa e bentana
y casi su rosea a para ora cu el a mira bao di djé un lamar asina
precioso, di un color aqua marina nuanzá cu un berde esmeralda,
cu e no tabata tin palabra pa describí tanto beyeza . Nunca promé
el a yega di mira e lamar for di un altura ya cu esaki tabata pa promé
biaha cu el a biaha cu avion, desde cu el a bay studia afó. Aya
na Merca ni lamar e tabata bay. E encuentro cu su familianan tabata pa
Pajan mashá emocionante y di biaha el a sintié na cas.
Ma ki un desilusion grandi ora cu el a tende cu e cunuco d Padushi ya
no ta existí como Hoffi di Dolorita, awor eta carga e nomber
Di Residencias Doloritas....
Na lugar di mata di fruta e ta yen di apartamento y caminda cu e mata
di shimaruco tabata pará awor, tin un piscina. Un dolor grandi
y un bashí a invadí Pajan. Ayó cunuco di Padushi,
ayó mata di shimaruco.
Coriendo rond ariba isla el a comprondé cu pa tur e progreso cu
su wowonan por a contemplá, un prijs halto a ser pagá. Ya
su isla no ta e pida paraiso cu el a bay laga hopi aña pasá.
Ayo mondinan..! Na unda e chuchubi, trupial y e pecho geel cu nan cantonan
alegre..!
Na unda e lora y e prikichi berde bunita...! Totolica, buladeifi y patrishi
ya no ta core rond y ta emití nan sonido melancilico, pa contrastá
cu e grito di e lora o e prikichi. Den Pajan su pensamento lo e sigui
cultivá su mata di shimarucu pa conservá asina algo di su
hubentud felis, acompaña di un nostalgia cu cual e ta bay laga
su isla.
Nostalgia pa algo cu ya no ta existí, su pida paraiso perdí...
|
