Cu un cara tristo Buchi tabata weita con nan a lasta su Kever hiba dump. Buchi tabata sá cu un dia lo e mester a separá di su Kever, pero na un manera mas digno. Hamas e por a pensa cu e fin di su Kever lo tabata asina.....

Na momento cu nan a zag Panchita, su Kever stimá, tabata manera cu ta sy curazon a parti na dos. Cuanto recuerdo bunita e no tin wardá di su Kever stimá, su promer auto...!

Su soño tabata pa conservá e auto den asina bon condicion cu un dia esaki por a bira un 'collector's item'. Pero destino a disponé otro...!

E promé dia cu Buchi a weita e Kever color corá den e showroom el a keda locamente enamorá di dje. Ta manera cu e auto tambe kier bisé:'Si, hibami, mi sa cu na bo man lo mi haya un bon trato. Lo mi sirbi bo fielmente, y nunca lo mi fayá bo. Drenta purba mi motor y goza con suave e tatraha. Ta manera música den bo orea. Pasa bo man riba mi body y cariciá mi pa bo sinti con dushi ta pa bo por ta mi doño. Y kiko bo ta bisa di mi colorcorá? Mi sa cu esey ta bo color faborito, color di shimarucu hecho. Imahiná bo ora cu bo pasa den caya grandi y......'

Buchi no por a warda e tentacion mas y a drenta pa busca mas informacion. Un rato despues el a sali for di e negoshi, doño orguyoso di un V.W. Kever...!

Tur dia den oranan di atardi Buchi tabata bay dal un careda ariba e boulevard. Hunto cu su mucha muher nan tabata bai admirá e bahada di solo aya na oriya di lamar. Nan tabata traha nan plannan pa nan casamento, mientras cu solo tabata cambia se shelo den e colornan di mas precioso.

E Kever Panchita tabata testigo di nan amor, cual tabata e fundeshi di un union cu a trece pa nan hopi felicidad.

E idea di a yama e Kever Panchita a bin di buchi mes, kende semper tabata recordá su yaya Panchita, kende tempo e tabata chikito tabata cargué y zoyé yen di ternura den su brazanan.

Yaya Pancha tabata seca su lágrimanan y tabata consolé. Yaya Pancha ya no teéy mas, pero den Buchi su curazon semper a keda un lugar special pa tur e recuerdonan bunita cu su yaya a laga pe.

Buchi ni un momento tabata tin di keha di su Kever, cual a resultá di ta un auto cu bo por a confia riba dje y cu masha poco gasto di mantencion. Unico cos ta cu el a bira un poco chikito despues cu Buchi a bin na yiu.

Mimi, su casá tur ora tabata bis:'Buchi, Panchita ta bira chikito pa nos familia. Ta diez aña caba cu nos tin e Kever. No ta mihó pa busca un otro auto?'

Pero Buchi no kier a pensa mes cu e lo mester a bay cambia Panchita pa un otro auto.

'Mimi, Panchita ta den bon condicion ainda, laga nos warda un poco mas.'

Berdad ta cu Panchita no tabata trahá pa e camindanan espantoso yen di buraco, di cualnan tur hende tabata keha. Corda cu Panchita cay den un di e buracunan ey, ta manera Buchi por a sinti e auto keha di dolor.

Ma .., e dia fatal a yega...!
Saliendo di trabao pa cas Buchi a dal den un di buraco famosonan y el a keda stacá...

Cu dolor di su alma Buchi amira con e Kever su chasis a parti nan dos. E no por a kere cu e buraco ey lo a pone un fin na Panchita. Un fin tristo pa un auto digno di a pronkea den un museo aki un cincuenta aña mas.

Ayó Panchita, ayó mi Kever stimá...!
Danki na bo mi a core rond mi isla pa asina ami y mi familia admirá e beyeza di su naturaleza.

Texto: © Digna Laclé-Herrera, mei 2005
Derechonan reservá: Digna Laclé-Herrera
Nada for di e texto aki por wordu copia di un manera ò otro sin autorisacion antemano di e autora.
Danki na sra. N. Hoevertsz cu a typ tur e storianan