"Ayó mama, te atadri". Purá Pedrito ta pasa man pa su tas y ta haake riba su lomba. Hamas e por a pensa cu awe ta speré un gran aventura y cu lo e pasa e susto di su bida. Fo'i rosea Wancito cuné ta corre drenta e porta di scool. Nan no ke yega laat pasobra e promé les ta di castisashi y Pastor sí no ta hunga.
Ta diez blaadji yen lo tin di scirbi over di e les!

Siman pasá nan a scirbi te haña blaar. Awe Pastor ta contanan di e milagro di cinco pan y dos piscá. Pedrito ta hisa man y ta puntra si ta piscá hasá.

"Ta ki co'i kens bo ta puntra, Pedrito? Bo mama no ta hasa piscá promé cu bo comé?", Pastor ta puntra.

"Sí Pastor, ayera mes nos a come piscá hasá cu panbatí, pero meneer a contesta nos cu na Hulanda tin un piscá cu hende ta come curú. Y nan ta comé asina'ki". Pedrito ta tira su cabez patras y ta mustra Pastor con e ta laga e piscá slip den su boca. Henter e clas ta hari y Pastor ta bira corrá.

"Pedrito, mi ta mira cu bo n' ta scucha. Hesus a biba na Palestina y no na Hulanda."
"Pero Pastor, mi a kere semper cu Hesus tambe ta macamba.............."

"Ban mira Pedrito, stop di kere y lagámi caba e storia. Despues boso ta bay pinta loke mi a conta."

Bao di geschiedenisles meneer ta pas un film di guerra na Vietnam. E último les e dia ey ta di jufrouw Roos. E ta duna muziekles. Wancito ta gusta les di juffrouw Roos mas cu tur otro pasobra e ta gusta canta. Bueno, e ta gusta pinta tambe. Pedrito tambe ta gusta e les di juffrouw Roos. Mas tanto dia cu nan ta usa e muziekinstrumentnan.

E ta e tocadó di maraca. Na cas e tin un par di maraca cu su tata a yega di trece p'e. Ora bel a bati juffrouw Roos ta corda pedrito riba e auto cu mester wordo labá. Hunto cu Wancito e ta bay busca un hemchi cu awa, un basora chikito y e gamuz.

Pedrito ta laba y Wancito ta bari e auto paden. Awe Pedrito lo laga e auto lombra manera nunca pasobra juffrouw Roos a contanan cu ta un fiesta e ta bay.

"Pedrito, b'a weita? Juffrouw a laga su jabi colgá na e switch.
Sigur lo ta e fiesta ta den su cabez." Pedrito ta rek su cabez y ta waak den e auto. Ta dentré un gana di starte.

E no ta pensa mas aleu y ta habri e porta di e auto y ta drenta sinta na e stuurwiel.
"Ta kiko bo ta bay haci, Pedrito?" Wancito ta puntra spantá.

"Bo ke mira cu mi por start e auto? Weita, si bo pone e man di e speed riba e letter "N" y draai e yabi e ta start. Esey ta mi prima a siña mi. E tin un auto mescos cu esaki. Y ora bo poné riba "R" e auto ta bay patras y riba "D" e ta bay pa dilanti. Bo ke mi mustrábo?"

Promé cu Wancito kier duna un contesta e ta mira Pedrito ta draai e yabi y e motor ta cuminza ronca. Pedrito ta waak Wancito cu un cara triomfante y ta bisé:"Wancito sak ey bao y pone bo man riba e pedal mas pabao. Poco poco sí, tende."

"Wancito ta haci loke su amigo ta pidié. E ta sinti cu e auto a cuminza moef y di susto e ta primi e pedal mas duro. Pedrito ta sinti cu e auto ta bai duro patras y e no por paré. E ta bira blanco, e no sa kiko pa haci. E ta mira cu e auto ta cerca di bay pega riba e baki di mata dilanti di eerste klas.

"Wancito kita bo man di ariba e pedal y poné arib'e otro. Lage bai Wancito," e ta grita.

Wancito ta kita su man pero na mes momento nan ta sinti un slá. E auto ta dal para. Pedrito y Wancito tur dos ta pega grit'i yoramento. Mientras tanto juffrouw Roos hunto cu e cabez di scol a core yega cerca, morto spantá. Meneer ta ranca e porta di auto habri y ta saca e dos muchanan afó.

Afortunadamente nada no a pasa nan. E auto tampoco a haya mucho cos. Un luz djatras a kibra ora cu e auto a dal e drum di sushi benta bao. E speelplaats a keda yená cu papel. Juffrouw Roos ta sinti cu e no por culpa e muchanan di tur cos. E mester a corda di kita e yabi. Pero Meneer sí ta haya cu nan mester di un bon straf y e ta ponenan bari henter e speelplaats. Ademas den nan dos nan lo tin di paga e luz. Ma juffrouw Roos cu sá cu ni Pedrito ni Wancito tin placa pa paga, ta contra di un straf pisá asina. E muchanan a hiba basta susto caba.

Pedrito y Wancito no ke corda kiko ta spera nan despues ora cu na cas nan haya sa di Pedrito su aventura como chauffeur..........