Mama, anj'i la Reina tin pustamento di flie atrobe. Sigur lo bo ta djaden Pedrito. Bo ta corda con anja pasá bo a hera gana?

E anja aki sí mi tin di gana. Anja pasá mi flie no tabatin sufuciente rabo. Pero e anja 'ki mi ta bai busca poco lapi cerca tanta Fina pa mi flie tin basta rabo. Mi ke gana dos premio, un pa e flie mas bunita y un pa e flie cu ta bula mas haltu.

Pero Pedrito, pa bo traha un flie bunita bo mester tin papel di tur color. Y esey ta costa placa. Corda cu nos no ta rivo. Cos ta masha caro den e tempo aki.

Mama, mi ta pensa cu podiser mi por laba auto pa e meneernan na skool pa mi gana algun cen. Y cu e placa ey mi por bai cumpra papel. Na Cabenda mi a mira bunita. Tur color tin. Con mama ta haya e idea ey?

Ta un bon plan Pedrito, pero bo mester pura sí, pasobra podiser otro mucha tambe por haya e idea ey.

Mayan mes WAncito cu mi ta bay puntra e meneernan. E juffrouwnan tambe. Tempran nos ta na skool. E placa mi ta partié cu Wancito. E tambe kier traha un flie.

Mama ta hari. Si Wancito un ta djaden e cos no ta bon. Su mayan Pedrito cu Wancito ta bon tempran riba "speelplaats".

Asina cu meneer Tromp a yega nan a core bay contré pa puntré pa nan laba su auto atardi despues di skool.

Un bon idea Pedrito. Y ta cuanto bo ta cobra?
Meneer ta kera cu un florin ta bon? Cincuenta cen panos cada un?

Wel Pedrito, si boso labé limpi limpi boso ta haya ƒ 1,50.


Meneer, lo weita, nos ta lage shain.
Meneer Tromp ta sagudí cabez y ta habri porta di klas.

Wancito, sigur ta meneer Meyer ta bin awor. Semper e ta yega despues di meneer Tromp. Pero un cos sí, ta meneer Meyer su auto nos lo no por pone shain. Ta ken por haci un wacharaca asina limpi. Ta mescos cu bo n' labé. Puntré abo Wancito, até ta bin. Awor ta bo beurt.

Meneer, mogen we uw auto wassen?
Maar Wancito, hoe kom je ineens op het idee?
We willen een paar centjes verdienen, meneer.

Pedrito a cuminza perde pasenshi. E meneer macambanan semper mester puntra riba puntra.
Despues cu Pedrito a splica meneer ta pakiko nan ke un par di cen, meneer a promintí nancu nan lo haya un florin pa lab'e auto.

Cerca juffrouw Croes tambe nan ta haya un florin basta cu e auto keda limpi.
Pedrito a reek cu, cu ƒ 3,50 nan tin basta cen pa cumpra papel. Ademas tres auto ta basta.

Atardi Wancito cuné a bay laba e autonan y a gana nan ƒ 3,50. E auto di meneer Tromp a keda blink manera spiel.

"Dia mi bira grandi lo mi ke tin un auto asina, Pedrito ta pensa."
Purá Wancito cu Pedrito a laga tumba pa cas. Cada un cu ƒ 1,75 den an saco. E placa ta yega pa papel y pa lijm. Liña nan tin caba di anja pasá.

Henter diasabra Pedrito ta traha riba su flie. Di un caha di lechi bieuw el a saca e palonan pa traha e forma. Cu mashá pasenshi e ta sinta plak. Ora, ora e ta pasa man ariba papel cu ta lombra asina bunita. Porfin ora e flie a bin cla el a bai purbé den cunucu. Tin basta biento. Pedrito no tin mucho trabao pa job e flie. El a bay e so pasobra e no kier pa ningun mucha copia su flie, ni su mehor amigo Wancito.

Ora pa ora e flie ta subi mas y mas haltu. Pedrito casi no tin mas liña. Apenas bo por mira e flie den e cielo blauw bunita. Ta parce cu e flie no ta moef.

Contento Pedrito ta baha su flie y ta bai cas purá pa conta Mama con bon su flie ta bula.
Porfin dialuna a yega. Pedrito casi no a drumi anochi di corda cu mayan ta anj'i la Reina.
Pustamento di flie!
Tempo ta bon. E biento ta basta duro. Riba veld tin cantidad di mucha. Pedrito y Wancito ta rondoná di nan amigonan di klas. Tur ta admirá e flienan, pero en berdad e di Pedrito ta algo spesial. E ta parce un pahra cu su halanan hancho habrí. E colornan ta precioso.

Tres meneer di skool ta cana waak e flienan pa weita ta cua ta mas bunita.
Esta un bunita bista, tur e muchanan pará cla cu nan flie ta warda e señal di meneer Tromp pa e flienan bay laira. Porfin meneer ta duna señal y un tras di otro e flienan ta subi. Caba bez mas haltu.

Pedrito cu mashá cuidao ta job su flie pa e liña no bruha. Segun cu e flie ta subi, Pedrito ta duné poco poco mas liña. Cu orguyo e ta miré ta pasa tur e flienan un pa un. Manera un pahra multicolor e flie di Pedrito ta subi mas y mas. Ya Pedrito no tin mas liña,pero cu legria e ta mira con su flie a pasa tur e otronan.

Muchanan tur na grto:"Biba Pedrito, Pedrito a gana, biba Pedrito!"

Pedrito su wowonan ta fiho ariba su flie.
Meneer ta duna señal pa baha su flie.
Tur e muchanan ta rondoná e meneernan pa nan tende ta ken ta e ganadornan. Tin tres premio pa e flienan mas bunita y tres premio pa esnan cu a bula mas haltu.

Meneer Tromp a pidi atencion.
"Promé premio pa e flie di mas bunita ta bai pa ....Pedrito Ras."
Tur e muchanan di klas ta cuminzá bula di contento rond di Pedrito.

Atrobe meneer Tromp ta pidisilencio.
"Pa e flie cu a bula di mas haltu e promé premio ta bai pa....Pedrito, Pedrito."
Tur e muchanan ta grita.
En berdad Pedrito a gana tur dos promé premio. Di tur banda su amigonan ta duné pabien.

Cu su flie riba lomba y e envelop cu dos "cadeaubon" den saco Pedrito ta bay cas.

Wancito no a gana, pero e ta asina contento pa su amigo. Ademas Pedrito a primintié cu e ta fié su bukinan cu e ta bay buska cu su "cadeaubon".

Di aleuw caba Pedrito ta mira Mama pará den porta y e ta core la Wancito atras pa e bay contro e bon noticia........