Den cuenca di Caribe un dia historia di un mundo nobo a cuminzá.

Cinco cien aña pasá e promé simiya dje raza Caribense a wordu sembrá na e momento cu Cristobal Colon a pisa tera, maraviyá a contemplá un coyar di Islas di un beyeza sin par poblá di e sernan humano mas bunita, el a kere cu ta na India e tabata y el a sclama: ta indjan nan ta.

Na mi regreso lo mi hiba un par pa exhibicion, un regalo pa e reynan di Castiya y Aragon. Ma pronto el a ripará cu e tabata kiboká.

Hamas e por a sospechá bao di nan desnudez un resistencia tenaz di Caciquenan audaz cu a defendé te na morto nan independencia ora cu e usurpadornan golos y sin piedad a penetrá y poderá di loke tabata lo mas preciá, nan yiunan, nan muher y nan propiedad.

Pero nan lucha no tabata por a sobreviví e forza brutal bao cual miles a keda masacrá, nan muhernan a keda violá y manchá, nan yiunan tabata muri di e trabow pisá.

Un Spaño de Las Casas, a pensa cu tabata bon pa importá for di Africa e negronan pa reemplazá e pobercito indjannan cu menos resistencia. Asina a skirbi un página preto den historia, berguenza grandi pa henter humanidad. Ma pronto mestizo, mulato, sambo, indjan a realizá cu for di tur e historia macabro y tristo a nace un raza fuerte y orguyoso, parti pafor multicolor, paden puro ritmo y sabor y nan a uni forza y voz pa nan a grita: biba e Caribeño, un raza nobo nos ta......!