|
Pará dilanti di un "boutique" na Playa, Pedrito ta
admirá e bunita cortina trahá di cocolishi. Dia di mama
ta acercando y Pedrito tin mashá deseo di duna mama algo bunita.
Aña pasá el a traha un netji florero na scool.
Dia di tata el a traha un asbak pa papa. Un cortina asina lo ta
masha caro y Pedrito sa cu nunca lo e por spaar e cantidad di placa ey.
Ni cuanto auto cu e laba pa e meneer y juffrouwnan na scool! Pero weitando
e cortina bon, Pedrito ta haya un idea, e mes por traha un asina. E cocolishinan
e por bay piki cant'i lamar y e liña pa e rijginan e por cumpra.
Esey lo no costa mucho. Tambe e mester di un lata fini pa e cortina por
cologá. Esaki e por haña na shop di Pablo carpinté.
Na scool lo e pidi meneer Tromp pa yudé y siñé con
e mester rijgi e cocolishinan na otro. Su mañan caba e ta papia
cu meneer Tromp di su plan.
Tur aña e ta gusta animá su muchanan na scool pa
nan traha nan mes regalo dia di mama y dia di tata. E kier siñanan
cu un regalo cu bo mes traha cu amor, bal mucho mas cu e regalo di mas
costoso den tienda. Y tur aña e ta ripará cu e ta hacié
cu mesun entusiasmo. E oranan di 'handenarbeid' ta resultá poco
pa e muchanan durante di e temporada ey. Ta pesey cu e ta keda algun ora
extra pa yuda e muchanan.
E mesun atardi Pedrito cu su amigo inseparabel Wancito ta bay cant'i
lamar pa busca cocolishi den e monton di santo dilanti di hotel. Meneer
a bisé cu ta masha hopi cocolishi e mester y sigur lo e mester
yena me dos caha di lechi pa e por tin suficiente pa un cortina. Henter
siman el a piki cocolishi. Algun di su otro amigonan di scool tambe a
bin yudé. Pa fin di siman el a yena tres caha. Meneer a warda nan
patras den clas. Pedrito mester a laba nan y despues sortea nan pa e haya
tur e cocolishinan di mas o menos mes tamaño. Esnan cu no por sirbi
pa su cortina meneer ta usa pa otro muchanan traha diferente pronkstuk.
E trabow di mas grandi ta pa bora e cocolishinan sin kibra nan.
Esey tambe ta tuma Pedrito algun tempo.
|
Yen
ánimo e ta cuminzá despues cu e rijgimento y segun cu
Pedrito ta mira e cortina ta crece su entusiasmo tambe ta crece. Ta
falta seis dia pa dia di mama yega y ya e trabow ta hopi leu. Ta parce
cu henter e clas ta mes ansioso pa mira e cortina bibi cla.
Varios di e muchanan ya nan "werkstuk" ta poní ariba
vensterbank pa muchanan di e otro clasnan pasa admirá. Meneer
ta nota cu Pedrito ta bira poco nervioso pa miedo cu e cortina no ta
bini cla pa diadomingo. Diahuebs nan tin e último les. Danki
Dios cu e cortina a bini cla! Meneer ta sintié mes feliz cu Pedrito.
Enberdad e mucha a traha un regalo precioso pa su mama! Bo por mira
cu cuanto amor el a rijgi cocolishi pa cocolishi.
Pedrito, bo cortina ta mas bunita cu esun di den "boutique",
meneer ta bisé. Henter e clas ta bati man ora cu meneer ta colga
e cortina pa nan mira. E cocolishinan di un color lichtroos ta lombra
y ta reflehá e luz di solo cu ta drenta pa e bentananan.
Pedrito su wowo ta briya di orguyo. "Pa bo, mama, mi a haci tur
mi posibel" y yen di ternura e ta cariciá e cocolishinan.
Diabiernes tur mucha ta trece un caha di zapato o di camisa pa nan paketá
nan regalo aden. Pedrito mester a bay busca un caha di camisa basta
grandi. Cerca su prima cu ta traha den un di e pacusnan el a haya uno.
Cerca meneer mes nan ta cumpra un vel di papel'i regalo pa cuatro placa.
Tur e muchanan ta sali contento cu nan regalo den man. Pedrito casi
no por carga di dje y meneer ta ofrecé pa hibé den auto.
Danki Dios mama no a yega ainda fo'i trabao y Pedrito tin chens
pa pone su regalo bao di cama. Diadomingo mainta mama lo haya su sorpresa.
Pedrito ta sintié e mucha di mas feliz.
|
