|
Tras di un parada di autobus tabata tin un zapato bieu bentá meymey
di otro desperdicionan manera cups, tayo di carton, bleki bashi di refresco,
enfin tur e testigonan di trabao dje asocialnan cu falta di respet pa
nos medio ambiente. E zapato a hala mi antencion mas ainda pasobra mi
no a mira e otro pia.
Porta cu un of otro cachó a lastré trece te ey,
Sigur ta cu e zapato ey a conocé mihor tempo, por ta cu e tabata
tin su propio pensamento bentá ey mey-mey di tanto sushidad, cansá
pa un actitud negativo cu a crea un situacion bochornoso asina.
Mi a pensa cu como zapato bieu sinembargo e tabata sinti su mes un poco
incomódo pasobra el a conocé temponan mihor.
Sigur e ora ey lo e tabata puntra su mes ta na unda e otro pia a keda.
E lo ta existi ainda ?
Of el a bira caba un klompi di carbon ariba drump.
Su curpa tabata co'i ril pensando ariba e posibilidad ey, aunke cu e mester
a aceptá cu drump tabata pe tambe e ultimó stacion.
El a laga su pensamentonan bay bek na tempo cu e tabata nobo.
Cu orguyo e tabata show su alegria y beyeza .
E charol combiná cu gamus tabata den completo harmoniá cu
su modelo.
|
Mey
mey di e diferente otro modelonan di zapato, enberdad e tabata resaltá
den e vitrina caminda cu e tabata na show.
E palabranan di admiracion procedente di e publicó cumprador tabata
yené cu orguyo.
E tabata sigur cu pronto lo e tabata pronkea na pai di un dama elegante
y bunita.
Y dicho hecho, un mosa hoben y koketa a cumpré pa dorna su pa nan
bunita.
E promé anochi cu el a luci na pia di e damita tabata na ocasion
di un recepcion na cas di Gobernador , hopi di e invitadonan tabatatin
zapatonan hopi netji mes, pero e complimentonan den su direccion tabata
yené cu mas orguyo.
Cu nostalgia e zapato bieu tabata recordá momentonan feliz riba
e pistanan di baile.
Cuanto walls e no a skirbi ribae flurnan bunita gepolish.
Ainda den su memoria e tabata tin sintimientonan dushi na momento cu e
damita tabata caricianan promé cu e tabata pone na su pianan.
Ki dushi su caricia tabatá !
Pero ay ….mescos cu ta pasa cu tur coc den e mondi aki ezapato bieu
ta constatá cu su mision a caba , e no tabata conta mas. Ayo sala
di baile , ayo tur glamour, ayo tur gloria.
Ata mi bus a yega ! Ayó zapato bieu !
Ohalá cu pronto nan bin haci limpi aki rond pasobra tanto sushidad,
tras di e parada di bus aki no por no por !
|
