Cenicienta tabata un mucha muher mashá infeliz. Su madrasa y su rumannan di crianza tabata traté mashá malo. Semper bai bo por hayé den cushina ta haci trabao. Tur ora bai e ta tabata sushi pasobra e no tabata haya ni un momneto di descanso pa epor a mira pa su paña y su curpa. E tabata masha bunita sí y pesey su rumannan tabata tin rabia riba dje.

Un dia rey a duna un balia na palacio y tur e muchamuhernan y e yoncumannan di e pueblo a haya invitacion pa e fiesta di tres dia.

Ora cu Cenicienta a pidi su madrasa pa e tambe bai fiesta el a haya un zundrá. Su rumannan a bisé cu ta pa laba flur y traha den cushina só e tabata sirbi.

Cenicienta akeda masha tristo y tabata yora sin consuelo ora cu el a scucha e caruahe cu a bin busca su rumannan pa bai fiesta. Yorando el a bai soño.

Diripiente el a scucha un sonido "tap, tap" riba flur. Ora cu el a habri su wowonan el a mira un muher bieu bistí cu zapatonan di gespu, un mantel corá y un sombré halto. Den su man un garoti cu konopi di oro.

"Cenicienta, mi ta bo madrina. Bisami pa kiko bo ta yora."

"Ay, madrina, mi ta yora pasobra mi tambe kier a bai e balia di rey."

"Bon, si t'esey, lo mi percurá pa bo bai. Trece un pampuna grandi for di den hoffi p'ami."

Lihé Cenicienta a haci loke su madrina a bisé y a trece e pampuna. Su madrina a traha un buraco aden y a mishi cuné cu su garoti. Na e mes momento e pampuna a cambia den un carosa geel y color di oro.

"Awor bai busca e ratval," e muher bieu a bisa.
Cenicienta a bin cu e ratval den cual tabatatin seis raton. Su madrina a habri e ratval y a cambia e ratornan pa seis cabay precioso.

"Awor bai busca e trampa pa djaka".
Cenicienta a bin cu e trampa y su madrina a scohe e djaka di mas gordo y a mishi cuné cu su garoti.
Mesora e djaka a convertí na un cochero gordo.

"Bai wak awor bao di e potji di mata y trece pa mi seis lagadishi," e anciana a pidi.
Cenicienta a haya seis lagadishi y su madrina a cambianan na seis lakei.

"Ban mira mi yiu, subi awor!".....e madrina a grita.
"Pero ta con mi ta bai fiesta cu e pañanan bieu aki!"...e mucha muher a sclama.
"Keto!"... e madrina a bisa y a zwaai cu su garoti.
Mesora Cenicienta a ripará con su shimis bieu a cambia pa un bistí color roos di mas bunita y den su brazanan armbandnan di oro y platino y rond di su garganta un coyer di perla. Su zapatonan bieu y kibrá a cambia na un par di zapato di cristal.

"Madrina..., ay esta feliz mi ta. Nunca promé mi a sinti mi asina feliz!" Y Cenicienta a buig pa gradicí su madrina.

"Un cos sí, mi yiu,....... promé cu oloshi bati diez dos 'or bo mester bandoná e balia. Sino tur bo pañanan bunita lo cambia na e traponan cu bo tabatatin promé."

"Claro cu lo mi no lubidá esey. Lo mi paga bon tino!"...e mucha muher a contestá.

E lakei a habri e porta di e carosa y Cenicienta a subi. Rápidamente e cochero a conducí e carosa pa e palacio. Ora cu Cenicienta a cna drenta e sala di fiesta tur e invitadonan tabata puntra ta ken e princesa bunita ey ta. E rey y la reina tabata puntra:"Ta ken e bunita dama ey cu ta baila cu nos yiu?" Pero ningun hende tabata sa kende Cenicienta tabata. Unico cos cu nan tabata sa, ta cu el a yega e fiesta den un carosa mashá luhoso.

E prins no kier a baila cu ningun otro cu no ta Cenicienta.

E muha muher a gana e cariño y simpatía di tur hende cu su comportacion humilde y su karakter dushi muha muher a gana e cariño y simpatía di tur hende cu su comportacion humilde y su karakter dushi.

Hasta su rumannan el a duna un trato cordial y esakinan no por a pensa nunca kende e tabata. Promé cu diez dos 'or a bati Cenicienta a yama ayó y e prins a hibé te na su carosa. Ora cu su rumannan a bolbe nan no por a papia di otro cos cu di e Princesa desconocí.

Cenicienta tabata scuchanan mientras cu e tabata yudanan kita nan paña.

"Su alteza real e princesa a fiha nos mashá," e ruman mayor a bisa.

"Si, y el a admirá nos bistí y sombré," e otro a agregá.

Cenicienta tabatatin gana di dal un grito di harimento ora cu el a scuchanan, pero e no por a bisa nada y el a subi e zolder pa e bai drumi. E anochi ey tur su pensamentonan tabata cu e prins y el a drumi soña cuné. Su anochi siguiente e prins tabata pará ta wardé na pia di trapi y ora cu e carosa a yega e prins mes a yudé baha. E tabata mas bunita bistí cu e anochi promé. Henter anochi e prins a balia cuné y Cenicienta a sintié asina feliz cu el a lubidá loke su madrina a avisé.

"Mi bunita princesa!".... e prins a bisé. Bisami kende bo ta, mi kier pa bo casa cu mi........" Pero apenas e prins a bisa e palabranan aki cu e oloshi a cuminzá bati diez dos 'or.

Cenicienta a dal un grito y a ranca careda bai na e porta. E prins a siguié, pero e mucha muher tabata mas lihé. El a core baha e trapi y por a scucha net e último sla di diez dos 'or.

Na e mes momento e tabata bistí atrobe den su traponan y den e caya dilanti di e palacio e por a mira un pampuna, un djaka, varios raton y lagadishinan cu tabata core den otro. Cenicienta a core bai cas y a bai sinta den un huki den cushina. Aya el a sinta yora su barica yen.

E príncipe por a bira loco ora cu el a ripará cu e princesa a disparcé. El a cohe un di e zapatonan di cristal cu Cenicienta a laga tras ariba e trapi.



E prins tabatin sigur cu ningun hende lo por usa e zapato sino tabata e princesa. El a pone e zapato riba un cusinchi di felpa y a laga su criánan pasa cuné den henter e pueblo mientras cu e heraldo real tabata proclamá cu e prins lo casa cu e mucha muher cu e zapato di cristal lo sirbi. Tur e damanan di e pueblo tabata ansioso pa pas e zapato pero ningun di nan por a bistié.

E rumannan mahos di Cenicienta tambe tabata loco pa por a casa cu e prins y tabata warda ki ora e healdo real lo yega pa nan pas e zapato. Pero con nan a primi e dobla nan pia pa por drenta e zapato nan no a logra.

Ora cu Cenicienta a weita e zapato su wowonan a yena cu speranza y el a puntra si e tambe por a pas.

"Abo nó..... Bay den cushina....!" un di e rumannan a grita. Pero e heraldo a mira cu e mucha pober ey tabata bunita y el a haya orden di e prins cu ta tur mucha muher mester pas e zapato.

Net cu e prins mes a pasa riba su cabay. El a drenta den e cas y a scucha for di boca di e heraldo cu te na e momento ey tur resultado tabata negativo. E prins a keda asombrá ora cu el a mira cu e mucha muher pober ey tabata bai pas e zapato. E zapato a cana dentra e mucha su pia suavemente y for di su saco di lantera Cenicienta a saca e otro pia di zapato di cristal.

"Abo..., abo un princesa...?" e rumannan a sclama. Nan a keda boca habrí.

E ora ey e hada madrina a parece y cu su toverstok el a cambia Cenicienta na e princes di e balia.

E prins a cai na rudia y a sunchi e man di Cenicienta y a proclamé como su futuro esposa. Nan a casa cu masha fiesta y nan tabata feliz...........

Texto: © Digna Laclé-Herrera
Derechonan reservá: Digna Laclé-Herrera
Nada for di e texto aki por wordu copia di un manera ò otro sin autorisacion antemano di e autora.
Danki na sra. N. Hoevertsz cu a typ tur e storianan